Kohima nung anogo ananü Good Governance mungdang agir

October 10, 2018 nü Hotal Vivor, Kohima nung Chief Minister Neiphiu Rio-i ‘Good Governance Initiatives’ indang mungdang nung o jembidang agiba noksa angur.

Kohima, Mongputeni (October) 10 (TYO): “Tim ketdangsübaren ya sorkari shima benshitsüba inyakyim ka masü saka senso aser sorkar atema tangutsü temeten ka lir,” ta tanü Nagaland Chief Minister Neiphiu Rio-i ashi.
October 10, 2018 nungi Kohima nung anogo ananü ‘Good Governance Initiatives’ indang Regional Conference tenzükba sentong nung Rio-i iba olen jembi.
Iba mungdang ya Capacity Building/Technology/Best Practices by Aspirational District omen nung ajemdaker amunger aser Department of Administrative Reforms and Public Grievances (DARPG), Government of India-i Nagaland sorkar den yaritepa ayonger.
Ozü sorkari timi ketdangsüba ya kanga tongti süa züngshir aser onoki Nagaland nung iba atema mapa aika tenzükogo. Anungji iba mungdang yangi amungba atema pelar, ta chief minister Rio-i ashi.
North East state tem aser Bihar, Chattisgarh o Kerala nungi teshimtet nübotemi ajangshia arubatem lemsatepba ajanga, asenoki kati ka dang nungi angazüktsü aser sensotem asoshi sorkar tajung ka agütsütsü, ta paisa metetdaktsü.
“Technology ajanga mapa tajungba inyaktsüteter. Aadhaar ama kuli ajanga tajangzük angutsüpur tonga mapa inyakteter. Banking aser mobile telephony prokshiba ajanga Direct Cash Transfers süteter aser JAM- Jandhan-Aadhaar-Mobile trilogy ajanga scheme balala tajungba nung inyakteter” ta paisa shisem.
Nagaland ama state nung DBT aser digital payments indang mapa inyakba nung tayongzükba ka ajurur aser ibaji tesem ajak nung bank peria maliba ajanga lir. Kasaji linük nung Digital India atema jembiaka Nagaland aser Northeast nung tanga state tem nung district aser block aika connectivity mali lir, ta Rio-isa ashi.
Mobile aser Banking maparen nungi tajangzük angutsü atema connectivity aser bank network tajungba kümdaktsütsüla. Asenoki Aspirational District inyakyim tenzüktsüla aser northeast nung meta talang pilar aliba tesemtem nung temulung agüja mapa inyaktsüla, ta paisa ayongzük.
“Asenok kati ka dang nungi angazüktsüla aser inyakyim tajungtem ajizüka mapa inyaktsüla” ta Rio-isa shisem.
Nagaland chief minister-isa DARPG dang State sorkar ketdangsertem skills tajungba akümtsü atema training balala agitsü mepishi.
Sentong nung DARPG, GoI Secretary K V Eapen-ia o jembidang, “good governance mapa junga inyaktsü atema ajangshia aruba lemsateptsü atema iba mungdang ya sabang ka lir” ta ashi.
Sentong nung Commissioner and Secretary, Abhishek Singh-i tesentepertem pela agizük aser Additional Secretary DARPG, GoI, Vasudha Mishra-i anküp tepela o jembi.
Anogo ananü mungdang nung technology for good governance, transforming aspirational districts, citizen centric services, capacity building & good governance initiatives onüktem indang sessions agitsü.