Kohima nung AR tetsürtem mapa lemzüktsü

Kohima, February 10, 2017 (Agencies): Brehostibarnü Assam Rifles mezüngbuba tetsür contingent Kohima nung mapa lemzüktsü, koba dang longkak aitertemi sorkar ki, gari aser office balala rongdoka raksatsür aliba tensa ka nung lir.
AR tetsürtemi ashiba agi, teburtem den kasa jenjang nung shilem agütsübaji kanga jangratemtsüka. “Mapang talangka nungi tetsürtemji tebur dang nungi teküpokba jenjang nung züngshia aruba onoki nguogo. Tangbo onok parnok den kasa toktepa raratsü,” ta Rifleman GD Aarti-i ashi.
Linük nung tejentiba paramilitary force nung tetsürtem yaküm inoksem. Parnok küm ka piyong training agiogo aser mapai yoktsü atema renemogo. Northeast tesemtem nung telungpurtem den raratsü asoshia renema lir. AR tetsür tem teimbaka India tesem balala nungi lir, saka lisopurtema karbo densema lir.
Nagaland nung tang tensa tamajung dang ama, Assam Rifle-i parnok nüngdakba tesemtem nung mapa lemzüktsür. Tang tashi nung parnoki mapa kanga junga inyakdar, aser tarutsü nükla tajung lir, ta Assam Rifles ketdangsertemi ashi.
Parnok rongnung tetsür kari ashiba agi, parnok ajungmesor tetsürtemji astronaut- Kalpana Chawla, Sunita Williams aser taoba mapang IPS officer Kiran Bedi nunger liasü ta ashi.
“Ni Major Ravi-i yangluba Malayalam movie”Kirti Chakra”-i kanga ajungmeso. Iba movie reprangba sülen ni army nung tena linük tenzüktsü asoshi jangra kümdaktsü,” ta Rifleman GD Roniya Joseph-i ashi.
“Ni AR nung matendangbo iba mapa ya kanga tasak asütsü ta bilem, saka tangbo kanga mela mela bilemer. Teburtemi inyaktetra kechiba onoki menyaktettsü?” ta Rifleman GD H W Konyak-i ashi.