ACYA indang 37buba Youth Day among

Dimapur, Aenjeti 30 (TYO): Kohima Town nung aliba Angami Catholic Youth Association (ACYA) indang 37buba Youth Day ya “For The Greater Of God And Men” omen nung ajemdaker St. Francis de Sales (SFS) parish nung Amungnü nikongdang mungogo.
ACYA wako salaba mapang, ACYA SFS nung Advisor, Ruokuolhoubei Timothy-i Catholic lanurtem dang osang tajung sangdongba ya lanur indang tongtibangtiba mapa asütsüla, ta ashi.
“Tangar dang osangtajung sangdongtsü asoshi asen taküm nung mezüng osangtajungji alitsüla,” ta pai ashi. Angami Catholic Youth Association nung ketdangser tasentem dang pelaba o ashiba mapang Timothy-i taoba ketdangsertem dang parnoki lanurtem tongtettsüa sentong balala ayongzüka agiba asoshi pelaba shisem.
Timothy-isa lanurtem dang medemer nem mapang agüja aser lanurtem aser arogo tsüngta apular ama asütsü ajungshi.
“Tanüla nung tashi mait aliba lanurtem bushia parnok den sensaksem lia tekülem kidangi arutsü ajungshitsüla aser teyari meshia Mother Mary dang sarasademtsüla,” ta pai shisem.
Pai-sa lanur ketdangsertem dang lanurtem nem mapang agüja tanüla aser mapa inyakba nung anitettsü aser aibelenba mapang totuyuba agütsüba den külemi meima amshitsüla, ta ajungshi.
Iba sentong tenzükba mapang parish tir, Rev. Fr. Richard Fenandes-i sarasadem, Vingurie Judith-i küm piyong inyakba osang agütsü aser ACYA tir tejenba, Andrew Tepa-i ACYA ketdangser tasentem tenüng nung James Solo nem ‘charge’ agütsü.
ACYA lanurtemi iba sentong nung temeja ken aten aser Aviu Augustine-i tepekla o jembi.