Kohima nung asanger telok ana tsüngda züktep, ka asü

Kohima, Sept 24 (TYO): Sept. 23 aonung 8:00 ako meta phone ajanga South Police Station, Kohima dang Box-cutting tesem nung telok ana tsüngda züktepdar ta osang aruba sülen Police telok ka iba tesem jagi ao saka parnok iba tesemji atongba mapang nungbo shianga maliasü, ta SDPO Kohima, Atu Zumvü NPS-i sangdong ka ajanga ashi.
Ajisüaka zükteper rongnung züngsem kabo Naga Hospital Kohima nung yaridar ta osang angazüka police telokji Naga Hospital-i ao saka hospital nung Medical officer-i paji süogo ta sangdonger liasü.
Asür sangji Hospital Colony, Kohima nung telitak aser Kohima Village nungi Kevise Suohu’er jabaso arishi küm 21 Medosetuo Suohu, ta Police-i jangjaogo.
Mezüng bushisüngdangba ajanga iba tatalokbaji nisung pongu tebur ana den mangatettep adokba nungi tenzük, ta bushitet. Iba sülen tebur ana jagi par medemer tenet phone ajanga aja aser parnok tsüngda züktepba mapang züngsem pongu aliba telok nungi ka tekolak nung zübo tulu keta yiruba ajanga hospital nung asü.
Tang police-i melung melemi pua alirtemji Mima yimer arishi küm 18 Vidusato Rhutsu, Kidima yimer Kevizoto (19), Chowainu yimer David Kape (19), Suthotsu yimer Khuveto (18), Mima yimer Meyato Rhuno (20), Chiechama yimer Vilabeizo Theünuo (20), Nepal, Pudwal yimer Sourav Dorjee (18), Chuchuyimlang yimer Temsusanen Jamir (18) aser Hurong yimer Setongba Sangtam (19) nunger lir.
Asür kinünger kati FIR ka South P.S Kohima nung benokba sülen par teku anema Kohima South PS nung nisung tepsetba ken o ka benoka bushisüngdangba mapang nisung teku pronglaji puogo.
Tang pua alir ajakji Brihostibar nü Chief Judicial Magistrate Kohima tsüngdangi anir ao aser judicial ket nung lir, aser bushisüngdang maneni agiba den post mortem osang atadar, ta kasa sangdong ajanga ashi.