Kohima nung ATM booth talila lapokdaktsünür

Kohima, October 31 (TYO): Nagaland State Cooperative Bank Ltd, indang Hon Jubilee nüngtem nung Business meet amendang customer temi state yimtiba nung ATM booth talila lapoktsü atema tebilemba metetdaktsü.
Tanü business summit nung o jembidang NStCB Kohima Main Branch CM, Jonah Sumi-i ashiba agi, NStCB lapoker küm 50 ajunger aser November 10 nü Dimapur nung Hon Jubilee benjung amungtsü.
Nagaland state kübok tesem balala nung NStCB indang kongsang 21 lapoka lir ta Jonah-isa ashi aser pai bank indang customer tem aser temeimertem dang pelaba shisem.
NStCB Ltd Vice Chairman BOD, Kekhwengulo Lea-ia staff temi mapa tajung inyakba atema tenüngsang agütsü.
State kübok tesem ajaklen tonga aoba bank ji NStCB dang lir aser iba bank ajanga aluyimertem dena yarir. NStCB-i commercial bank dena tokteper aser state sorkari teyari agütsüba atema pelar, ta Lea-isa shisem.
Sentong nung NStCB Kohima BOB, T Abao Kire aser taoba MD NStCB, Sedehol Sale nati o jembi.
Sale-i 1974 nungi 2007 nung pa mapa nungi anisüngzük mangu tashi NStCB nung inyak aser pai Golden Jubilee atongba atema bank nem tenüngsang agütsü.
Sentong nung mendenji Kohima Mani Branch ABM, NStCB, Kevi Hibo liasü, 1st AG Church, Kohima Pastor Rev.Dr.TR Angami-i temoatsü meshia sarasadem, NStCB Main Branch, Kohima FO Keduseho Sale-i tesentepertem pelaa agizük aser NStCB, HSJ Branch BM, PP Bose-i anküp tepela o jembi.