Kohima nung AYO-i tzü mopong merük

Kohima, Oct 5 (TYO): Alima nung nisungtem anema alitsü asoshi tzü mopong memenendaktsü kümzüka ayutsü merangba sentong ka tanü Bodbar nü Kohima nung Angami Youth Organisation (AYO)-i ayongzüka liogo.
Iba sentong nung anepdang 6:00 ako nungi nikongdang 6:00 ako tashi kodamasür aser nübortem asoshi rongdak nüngdak senzürtem dak alaka Kohima town nung gari kata mesenzüdaktsüi sota ayu. Iba ya mokdangba sentong ka masü, anungji nisungtem tetsüng agibo senzüdaktsü ta AYO lenirtemi metetdaktsü.
Iba denji ano electric tashi amshia mapa inyakertem anendaktsü aser dokantem lapokyonga yangji light amshia inyakba mapatem meinyaktsü asoshi metetdakja liasü.
Gari mesenzüdaktsüba agi school karbo sodi agütsü aser karbo tetsüng agi school-i orr arudaktsü.
Iba sentong ya ajak asoshi tarutsü lima tajungba ka yanglutsü atema merangba mapa ka asünungji, kechisa yanglushitsü nüngdaker yanglushitsüla aser kechisa wazüka ayutsüla ali, itemji kümzüka ayutsüla ta AYO lenirtemi metetdaktsü.
Parnokisa iba sentong nung yaritepba asoshi nübortem ajak dang pelaba metetdaktsüogo.