Kohima, February 20 (TYO) : Bambusa-i ajaki alia chitetba chiyungtsü angudak, family restaurant ka Kohima High School Junction tesem nung lapokogo.
Chiyungtsü kanga senatua achirtem asoshi ibai osang tajung lir kechiba süra Bambusa nung Chinese, Sikkimese, Indian aser Naga nunger chiyungtsütem angutsü.
Iba nüngtugu restaurant ya 2013 küm tenzükba sülen tan agi pezü buba lapoker aser Bambusa ya High School Junction building nung Baskin Robbins tekadang, tatongtep tanabuba nung lir.
Bambusa-i ki tonga chiyungtsü bentsür aruba mapa inyaker aser tanurtem senden den lokti balala atema chiyungtsü renema anepalua agütsüba mapa inyaker (catering).
Restaurant telung nung au agi tobur junga yanglua alibaji Bamboo architect, Vizo Putsure-i yangluba lir.
2013 küm NDBA teyari ajanga Bambusa tenzükba otsü jembiba mapang Bambusa kibur, Medo Putsure-i, “Au agi ki ka tema telung ajak nung design tajung tapu aika yoktetba nüburtem nem metetdaktsütsü tebilemba nung iba ya tenzük. Iba den külemi Bambusa restaurant nung mapa inyakertem Naga nunger asütsü nükjidong tuluba lir. Tang Bambusa nung inyaker Naga nunger lanur nisung 45 tashi lir,” ta ashi.
You must be logged in to post a comment Login