Kohima nung BPO ka lapokogo

Kohima, January 27 (TYO) : Nagaland yimtiba Kohima nung tanü Chief Secretary, Pankaj Kumar-i Business Process Outsourcing (BPO) Centre ka lapoktsüogo.
BPO ya Information Technology and Communication Department Government of Nagaland aser Infinity Informatic Pvt. Ltd tsüngda Public Private Partnership (PPP) inyakyim nung lapoker.
Kohima BPO nung menden 400 lir aser iba ya North East tesem nung BPO tulutiba asütsü.
Tanü BPO mezüngbuba shilem lapoktsüdang Pankaj Kumar-i ashiba agi, “BPO ya state atema kanga dang tongtibang lir kechiyong iba centre ajanga zünger mapa mengui aliba lanurtem nem mapa inyaktsü maongka agütsütsü.”
North East Region nung lanurtem atema balaka bilema inyakjang ta India sorkar dang mepishia, Chief Secretary-isa “Asen lanurtem tejakleni aoer aser technology o gadget tem amshitsü shia meteta lir,” ta metetdaktsü.
Sentong nung Commissioner and Secretary IT&C, K D Vizo-ia o jembidang ashiba agi, “BPO dang ‘call centre’ ta-a ajar aser iba ajanga maparen indang osangtsüsang metetpelar aser business asoshi jenti inyakteter.”
India sorkari Digital India Programme tenzükba kübok northeast nung BPO industry ajungkettsü atema North east BPO promotion scheme (NEBPS) tenzük, ta paisa ashi.
NEBPS scheme ajanga jila tilatem indaktsütsü nükjidong lir aser Department of IT&C kübok Nagaland State e-Governance society (NSeGS)-i iba maongka agia, Infinity Informatic Pvt. Ltd. den tesentaktep yanglua NE tesem nung BPO tulutiba lapoker, ta K D Vizo-isa metetdaktsü.
Nagaland nung English oshi kanga junga jembiba lanurtem lir aser parnoki alima jenjang den kasa mapa inyaktettsü, ta paisa shisem.
Sentong nung Infinity Informatics Pvt. Ltd. Director, Jayant-i BPO indang power point presentation ka sayu aser Informatics Private Ltd. Director, IT&C, Tongtiliba Longkumer-i anküp tepela o jembi.