Kohima nung BRO-i lenmang atepshiba AYO-i anentsür

Kohima, October 29 (Agencies): State yimtiba, Kohima nung Border Road Organisation (BRO)-i ketdangsüa gari lenmang yanglushiba aser atepshiba maparen Angami Youth Organisation (AYO)-i tanü nokdangogo.
October 29 nü osangkakettem nung Nagaland Chief Minister-i BRO aser PWD dang state yimtiba aser telungtet nung gari lenmang yanglushiba maparen tenzükang ta tuyuba osang dak sentakba nung AYO Tir, Medo Yhokha aser general secretary, Rokoketou Sechü nati, lenmang kanga majungba atema o temeten jembiba aser sorkari nüburtem dang süoki ia agia sayuba ya sensotemi akhangba masü, ta ashi.
“Item ya küm aika nüburtem dang shia aruogo aser bangdak ketdangsertemi agütsüba telangzüba ajanga onok mepelar,” ta parnoki ashi.
AYO-isa, bangdak ketdangsertem nem takhangba agüja aliba nungi masetshitsü, ta ashi. Ita ka mesüra iba dak tali-a mamshitettsüsa lenmang atepshiba dang masü saka mongpu ajak tizüktettsüsa lenmang yanglujang, ta AYO-i akhanger.
NH-29 aser Nagaland nung tanga lenmangtem yangluba nung tamakok atema ken o benoktsü aser BRO nem khuret benoktsütsü atema-a akhanger.
“Ochi temeten jembitsü aser nüburtem nem tai tongloktsütsü atema onoki parnok (BRO) dang nungi telangzüba memeshi,” ta AYO-i ashi.
“Tang tentak Hornbill Festival junga katettsüji nüburtemi nüngdakba ka masü, aser onoki lenmang aika akhanger masü saka lenmang tajung akhanger,” ta parnoki ashi.
Parnokisa, bangdak ketdangsertemi mongpu ajak tizüktettsüsa lenmang tajung meyanglutettsü süra taküm atemabo lenmang koma ali’ar yamaji dang tokjang, ta shiogo.
Ibayongji AYO tangsa, ali aser lishi agi lenmang atepshibaji anentsü akhanger. Jila ajaklen aoyi agi tangu mesashiteter aser iba ya maremzüktettsüsa ka kümogo, ta AYO-i ashi.
Iba onük dak sentakba nung AYO-i October 30 anüngdang 11:00 ako nung AYO Office nung Range Unit ajak nungi executive council senden ayongzükogo.