Kohima nung capacity building sentong agi

Dimapur, Rongjui/September 26 (TYO): State Silviculturist, Department of Environment Forest and Climate Change, Nagaland-i frontline staff tem atema Forest Fire Prevention Management dak sendakba nung capacity building sentong ka September 25 nü Forest Office Complex Kohima, Conference Hall nung ayongzüka katsüogo.
Iba sentong nung Conservator of Forests, Dr. Kenei Miachieo, IFS tongti o jembir liasü. O jembiba mapang conservator-i ashiba agi, yimdaklirtem aser department, talisa frontline staffs tem tsüngda indang indanga sendakteptsüji kanga tongtibang lir. Paisa, information technology putu nung tanü asü technology balala adokba maongka agia, morok mi oya aliba jangjatsü aser nokdangtsü atema osang takaratiba nung agiteptsü ajungshi.
Sentong nung RO Silviculture Range, Mokokchung, Shilutemjen-i lokti pelaa agizükba o jembi aser RO Silviculture Range, Kohima, Mato Koso-i tepela anküp o jembia liasü. Technical session nung shisalen agütsürtem rongnung State Silviculturist, Lhinghoikim Touthang IFS-i “Forest Fire Prevention Management”, onük nung jembi, DFO Kohima, Rongsenlemla Imchen IFS-i “Forest Fires of Kohima” onük nung jembi, Working Plan Officer, Samom Khelen Singh IFS-i “Use of technologies for early Fire detection”, onük nung jembia liasü. Maneni mibendang amshiba hadir balala amshiba yimya Forester I, Sunep aser Deputy Ranger Imtimar Walling nati sayua liasü, ta ketdangser sangdong ajanga metetdaktsü.