Kohima nung CE motorcycle rally agiogo

Kohima, Rongchii/April 02 (TYO): Nagaland Motorcycle Club den longjema Kohima District Administration-i April 02, 2019 Mongolbarnü “Yes to Clean Election” omen nung ajemdaker motorcycle rally ka ayongzüka agia liasü, ta sangdong ajanga metetdaktsü.
Office complex nung Deputy Commissioner & DEO Kohima, Anoop Khinchi IAS-i iba rally flag off sütsüba mapang pai ashiba agi, district SVEEP campaign shilem ka ama clean election omen nung ajemdaker nüburtem dang awareness sangdongtsü atema iba motorcycle rally ayongzüker.
Anungji, tarutsü lenmang yanglutsü atema pei temeden vote agütsütsü osang nüburtem dang sangdongtsüla, ta rally nung shilem agir ajak dang Anoop-i tayongzükba agütsü.
Clean election atema iba ama sentong ayongzüka shilem agiba ajanga nüburtemi angatettsü, ta Anoop-isa imlaa ashi.
Iba motorcycle rally sentong nung biker nisung 40 agi shilem agiogo. Biker telokji Marshal Daniel Metha-i ani aser parnok sülenji Medo Makrietsu anidak. Rally mapang biker temi Kohima jila ajunga ayimjema Old MLA Hotel junction, Keziekie, High School junction, Secretariat, Don Bosco junction, PHQ aser Lerie tesemtem nung mapang tatsütsü anena sema senzür külen box cutting area nung rally tembanga liasü, ta kasa sangdong nung shia lir.