Kohima nung Child Rights meteta lidaktsütsü atema sentong agi

Kohima, June 18 (TYO) : Zonal Council Kohima nung District Child Protection Unit, Kohima-i Child Rights indang sensitization programme ka ayongzüka agi.
Iba sentong nung o jembirji Kohima Deputy Commissioner & District Child Protection Committee Chairman, Rovilatuo Mor liasü.
Sentong nung adenertem dang Rovilatuo Mor-i ashiba agi, Integrated Child Protection Scheme (ICPS) ya Union Ministry of Women and Child Development kübok Centrally Sponsored Scheme tasen ka lir aser iba ya linük nung tanurtem lendong nungi kümzüka aser jenbua lidaktsütsü nükjidong nung yangluba lir.
ICPS nung senotsü teyari densema lir aser ano child protection inyakyim balala atema teyari agütsür, ta Mor-isa shisem.
Juvenile Justice Act 2015 nung Arla 2 (12) ajanga arishi küm 18 majungba nisung ajakji tanur ta züngshir aser Central Ministry-i State sorkar tem ajanga ICPS mapa küma tenzüker, ta paisa metetdaktsü.
Mor-isa ashiba agi, Nagaland asoshi senotsü telemsaji 90:10 yimya nung lir.
Nagaland nungbo November 2010 nungi iba mapa tenzük aser State Child Protection Society, State Adoption Resource Agency o DCPU tem tentetogo. District shia nung Juvenile Justice Boards, Child Welfare Committee, Juvenile Police Unit tem lapokogo aser ano police station shia nung Designated Child Welfare Officer ka ka lir, ta Kohima DC-isa shisem.
Item denji Kohima aser Dimapur atema Childline number #1098 mapa tenzükogo aser Kohima nung Homes 7 (CCI) lir aser item rongnung State Child Protection Society Nagaland-i Home 5 nem teyari agütsür, ta Mor-isa metetdaktsü.
Kohima kübok aliba yimtsüng shia nung Village Level Child Protection Committee tenteta lir aser Kohima jila kübok ward/colony chairman ajaki pei pei kiyong nung Child Protection Committee tentettsü mepishir, ta Kohima DC-isa shisem.
Iba sentong nung mendenji Counsellor DCPU Kohima, T. Pungoyi Nienu liasü, District Child Protection Officer, Povezo Puro-i tesentepertem pela agizük, Society Director SCPS, Z. Nyusietho Nyuthe-i okila jembi aser Bright Morning Star nungi tanurtemi ken ka ajanga shilem agi.
Technical session nung shisalen sayurtemji CWC member secretary aser Kekhrie Foundation president Vibazonuo Kire, Member JJC & Principal Kohima Law College Visevonuo na liasü aser tenati Child Rights, Juvenile Justice Act indang presentation sayu.