Kohima nung ‘Child Sexual Abuse’ indang sentong agi

Dimapur, October 9 (TYO) : October 9, 2015 nü Oking Christian School Kohima nung ‘Child Sexual Abuse’ indang meteta alitsü sentong ka ayongzüka agi.
Iba sentong ya “Its your turn to make a difference” omen nung ajemdaker agi aser onük jembirji State Coordinator, State Resource Centre for Women, Gracy Ayee liasü.
Tanurtem dak iba mapa inyaktsü kanga tezüpa aser parnoki ola madoktettsü ta bilemer aser idakji rangloker iba sentong ayongzüka agir, ta Gracy Ayee-i ashi.
Parnok dak tashiyim mapa inyakerji kidanger, kinünger, medemer mesüra tesayurtem asütsü akok. Anungji kechi ataloklir ataloka memiimshidang iba osangji metetdaktsütsüla, ta laisa tanurtem ayongzük.
Gracy Ayee-isa Ministry of Women and Child Development-i yangluba National Winning Movie (Komal) sayu.
NSSWB Secretary, Daisy Mezhur-ia o jembidang ashiba agi, tanurtem parnok tila asüdang timtem kecha melii lidaktsütsü nükjidong nung iba sentong ayongzük.
Tanur dak tashiyim mapa inyakbaji alima tangalen dang masü saka Nagaland nunga ataloker aser iba inyakyim ya noktangtsüla, ta Daisy-isa ashi.
Iba sentong nung laisa ‘No to Child Abuse’ ta züluba wristband ka ka tanur ajak nem lema agütsü.
Kohima Childline-ia child sexual abuse indang pamphlets aser stickers alem aser toll free call no. 1098 nung teyari nüngdakba tanurtem indang osang metetpelatsü metetdaktsü.
Tanü agiba sentong nung mendenji Medochinuo liasü, Oking Christian School praise band-i ken aten aser Ruovinuo Kiewhuo-i anküp tepela o jembi.
Iba sentong ya Nagaland State Social Welfare Board-i State Resource Centre for Women den yaritepa ayongzük.
Ano tanga sangdong ka nung ashiba agi, State Resource for Women (SRCW) aser Nagaland State Social Welfare Board-i October 14, 2015 nü “Child Sexual Abuse” indang workshop ka ayongzüka agitsü.
Iba sentong ya State Institute for Rural Development (SIRD) Kohima indang Conference Hall nung anepdang 9:00 ako nung tenzüktsü aser tetushi süa jaokerji Secretary to the Government of Nagaland, Dellirose M. Sakhrie alitsü, ta sangdong nungsa shia lir.
Iba sentong ya Goa nungi NGO ARZ (Anjay Rahit Zindagi) den yaritepa ayongzüker aser “terre des homes”, Netherlands-i teyari agüja nungiter.