Kohima nung ‘Clean Election’ atema o toktep

Dimapur, October 11 (TYO) : October 9, 2015 nü Kohima Deputy Commissioner & District Election Officer-i college kaketshirtem atema “Clean Election is possible in Nagaland” ta ser o toktepba sentong ka ayongzüka agi.
Iba sentong ya DC, Conference hall Kohima nung agi aser Kohima college, Kohima nung BA 4th semester kaketshir Ralu Keyho-i tetoktepertem rongnung mezüngbuba jenjang nung takok angu.
Tetoktepertem rongnung tanabuba jenjang nung Science college nungi Veibizonuo Rupreo aser tasembuba jenjang nung St. Joseph college, Jakhama nungi Pauninglunbe nati takok angu.
Iba sentong nung ADC, Kohima Lithrongla Tongpi-i, tang teinyakdak special summary revision nung electoral roll merüktettsü atema shilem agiang, ta ayongzük.
Electoral roll nung tenüng khen dang züluoktsüla aser tasür mesüra aiben züluoka aliba tenüngtem agientsüla, ta laisa ashi.
Iba tetoktepba nung Kohima aser temeket aliba college 11 nungi kaketshir ananai shilem agi aser Japfu Christian college nungi Ngukato L.Aye lenisüba nung Motion telok aser Alder college nungi Atopu lenisüba kübok Against Motion teloki shilem agi.
Tetoktepba asoshi tetendangertemji Sr.News Reader, AIR, Jonas Yanthan, Revenue Officer, Kohima, T.L.Kiusumong Tikhir aser Deputy Mission Director RMSA Dr. Kevi Rio nungertem liasü aser onirji AEO, Kohima R. Mhathung Ngullie liasü.
January 25, 2016 nü State Level National Voters day mapang takok angur nem senpet agütsütsü.