Kohima nung CSTK Hon Jubilee among

Dimapur, Nov. 19, 2021 (TYO) : Changtongya Senso Telongjem Kohima Hon Jubilee Mung November 19, 2021 anogo munga liasü. Iba anogo Tetushi Tejaoker, Wb. Imnatiba, Advisor, Industries and Commerce, Labour and Employment, Skill Development and Entrepreneurship ajanga yamai ashi, “Tsüngremi meimba aser ajiokba nisungjibo mela mela magiener. Anungji Aor nisung shia pei taküm tali shia lira Pa memoatsüi malitsü. Aori Tsüngrem teyongtsü südaktsür tasü ita alima ani nungbo alimai asenok sülen anidaktsü. Yamaji mesütetra tebenjaba taliang adoktsü. Aorji tangari meinyaknüba inyakba kin, tangari monüba limai onüba kin, tangari meinyaktetba mapa inyakteta sayuba kin.

Pei nem temoatsü agütsüdangbo asen mulung ajak agi Tsüngrem tenüng asanger saka kodang kidanger ka kasa temoatsüji angu nung asenoki tenük meremer. Tenük merem ya asenok dak nungi agientsüla. Asenok kati ka tenük meremba agi temeim mekonga akümer. Anungji senso kati ka meimtsü asoshi asen takümji Tsüngremi aniba taküm kaka südaktsütsüla”.

Tongti O jembir Dr. Tainla Mari onük Mesensenba Mitsa omen nung ajemdaker jembidang ashiba agi küm 50 yabo süngjang jitetba mapang ka, oda tenükshitsü mapang aser tarendaktsü makaba mapang ka lir. Yimtsüng nung nokinketer lira parnoki yimer tsükchir ket nungi kümzüka yutetba ama tanü nüburi temulung lemtettsüsa nübu tajung alimai nüngdaker. Rongsenketsüng, shisaliok aser political tsütsü nübur mesenseni anitsü asoshi asen Aor rongnung nübu tajung alitsüla. Telongjem, temeim, ajemalu aser pei sasa azüoktetba taküm kaka südi ta sentepa alirtem ayongzük.

Iba sentong nung Jubilee nüngsang sarasadem Rev. A. Chuba Jamir, Pastor, KABA; Tayongzükba Wb. T. N. Jamir IFS (Rtd.) ajanga agi aser Tepela O jembirtemji Kohima Aor Telongjem, Langpangkong Senso Telongjem Kohima, Changtongya Village Council aser S. P. Fransis, Managing Director, Model Higher Secondary School Kohima liasü. Temeja ken ka Changtongya Kaketshir Telongjemi aten, Jubilee Bangzüng T. Mar Longkumer Executive Convenor, CSTK aser melepzüng o I. Noksang, Convenor, Hon Jubilee Planning Committee ajanga agi.