Kohima nung Culture Paradigm National seminar agi

Kohima, November 1, 2019: Hokolbarnü Hall-8, Don Bosco College, Kohima nung ‘Cultural Paradigm- The Pluralistic Noth East India: Appreciation the diverse culture of North East India’ National Seminar agiba sülen tangokba noksa nung angur.

Kohima, Nov. 01 (TYO): Research Cell aser IQAC Don Bosco College, Kohima-i ayongzüka November 1, 2019 nü Hall-8, DBCK nung ‘The Pluralistic North East India: Appreciating the diverse culture of North-Eat India’ onük nung Culture Paradigm National seminar ka agiogo, ta ketdangsertem osang ka ajanga metetdaktsü.
Okila jembidabng taoba mapang Pro Vice Chancellor, NEHU, Kiremwati-i, nisungi dang tenük agi anguba dang nungibo mangubatem tepor tajungba ta bilemer, ta ashi.
Nagaland ama state tilaka nunga tesem balala shiaji peipei sasep nung tepor junger, yamaji alima nung sobaliba telok balala angazükteptsüla, ta pai ashi.
Paisa, North East India nüburtem yimyatsüya aser sobaliba jenti lir, ajisüaka azük ka nung ‘beads’ balala lisü kati alentepba tepor ajungba amai külemi liteter, aser ibaji litsü sasep ajanga dang masü saka sobaliba balala tsüngda meima akhümtsübutepba ajanga lir, ta ashi.
Paisa, India aser alima nung sobaliba melenshia ochishiba, meranga inyakba aser tanga yimya tajungtem ajanga lenmang tanga agütsür, ta ashi.
Iba dak sendakba nung pai, item temelenshi ya northeast India nung sobaliba yimya tasen ka süra tarutsü nung nüburtemi koma nokdaktsü, ta pai asüngdang.
Kiremwati-isa, tang linük ka aser oshi ka tangatetba; linük nung shisaliok asüngsashi aser yimtenren ajanga tetsübu makai research agitettsü atema universities aser colleges atsüer arutettsüla, ta ashi. Kasa sentong nung Retd. Principal Secretary, Thepfulhouvi Solo-ia jembia liasü. Iba sentong ya Jarani Mao leniba nung agi, Vice Principal, DBHSS, Fr. Innocent-i lokti pelaa agizükba o jembi aser Seminar Convenor, Dr. Lanukumla-i tepela anküp o jembia liasü.