Kohima nung Deputy Speaker meyong ki jara tsüksatsü

Kohima, Rongchii/April 26 (TYO): Tentonü (Mongolbar) nikongdang 2:30 ako meta Kohima kübok Lerie kiyong nung Bolero Pickup gari kati Deputy Speaker, Zhaleo Rio’er nija ki jara tsüksatsü.
Iba lendong atalokba mapang nungji Deputy Speaker bo kidang maliasü, kechiyong pa NBCC Convention Centre, Kohima nung ayongzükba Nagaland VDB & Village Council Conference nung adenba sülen office-i oa liasü.
Official quarters agi mataba agi Deputy Speaker, Rio bo par nija kidang alir. Bolero gariji taoba mapang Parliamentary Secretary, Deo Nukhu indang liasü aser iba lendong nung gari anisangji meyiru, ta osang angazüker.
Iba lendong atalokba mapang Deputy Speaker ji kidang ali asübo nisung karbo yirur lila, kechiyong pa kidang ali asübo security sepaitem aser tesemdangertem aika Bolero Pickup tsükba tesem nungji lila.
Osang angazükba agi, gari anisang jagi gariji workshop-i anir aoaba mapang nung ‘brake fail’ asüba ajanga pai gariji mazüokteti Rio’er nija ki jara nung tsükoktsü.
Ano tanga tatalokba ka nung Rasemnü (Bodhbar) Deputy Speaker kidangi meyipa aruba mapang Mohonkhola kiyong anasa tetsüng ana aketba gari kati pa meyong gari nung tsükoktsü.
Osang angazükba agi Deputy Speaker escorts-i gari ajangteta maotsü atema temaitsü sayu ajisüaka gari anisangjagi ajangteta arur gari dakji tsükoktsü; ajisüaka nisungbo shunga meyiru.