Kohima nung DIPR jeli Christmas mongogo

Dimapur, December 19 (TYO): IPR Citadel, Kohima nung December 18, 2017 anogo Department of Information & Public Relation jeli Christmas mongogo. Iba sentong nung tongti tesemdangerji Secretary, Information & Public Relation, Lithrongla G. Chishi IAS liasü aser Rev. Dr. Tseibu Rutsa-i Christmas osang aben.
Director IPR, Limawati Ao-i iba sentong nung Christmas salem osang abenba mapang Department ajanga mapa balala nung takok anguba lemsatep aser Tsüngrem taochi ajanga 2017 küm mapa aika inyaktetogo, ta ashi.
Christmas mapang ya kinunger aser medemertem den tepela aser temeim lemsatepba mapang aser pei temoatsütem züngdangba mapang ka lir, ta Director-i ashi.
Secretary, IPR, Lithrongla G. Chishi IAS-i iba sentong nung jembiba mapang, Christmas tetetzü temeim aser tepela lemsatepba mapang ka lir, aser asenok dak temeim tanüla ya Christmas mapang dang masü saka küm tepiyong alitsüla, ta ashi.
“Yisu ji asen mulungjang nung angoshia sodaktsütsüla aser 2018 ya Khristanpur ka ama bendanga agütsüba küm ka südakja yimjung, temeim aser nüngdakbapur asoshi lenmang sayur ka südaktsüti,” ta lai sentepa alirtem ayongzük.
Mapa ya tekülem ama lir aser Khristanpur ka ama nisung ajak sorkar mapa inyaker tajung kaka asütsüla, ta laisa shisem.
Rev. Dr. Tseibu Rutsa-ia Christmas osang lemsatepba mapang, “Christmas ya kati ka dang tai atokba kuli/mapang lir aser Khrista den külem adianutem dang temeim sayuba mapang lir,” ta ashi. Christmas ya benjongtepba kisüng masü saka pei tai temenen nangzükba mapang lir, ta Rev. Dr. Rutsa-isa shisem.
Paisa ashiba agi, pei tsüraburtem nem Christmas mapang sempet tulutibaji Yisu Khrista ya asen kümtetdakba, ta agizükteta Pai mulungba ama aliba ya lir.
Paisa department nung inyaker ajunga dang bendanga agütsür mapa shidak inyaktsü ajungshia liasü.
Registrar, IPR, Wati Atsongchanger-ia iba sentong nung adenertem dang Christmas benjong amongba mapang Tsüngrem nem bendanga agütsütsü ajungshia liasü.
Iba sentong ya Atuzo Peseyie-i ketdang süa ani aser Throngrong-i Lai zünga sarasadem aser tatem sarasadem ya Nouneseno-i agi.
Iba sentong nung inter-section choral competition agia liasü aser iba sülen entertainment session, karaoke, bonfire aser Christmas chiyong chiyonga liasü.