Kohima nung DLSC mezüngbuba senden ayonga amen

Kohima, Aenjeti 20 (TYO): 13buba Nagaland Legislative Assembly Election atema mezüngbuba District Level Standing Committee (DLSC) aser Model Code of Conduct & Expenditure Monitoring senden tanü DC Conference Hall, Kohima nung menogo.
Iba senden nung Kohima district kübok melungtet telok balala aser yimtenren party balala nungi züngsemtem dena liasü.
Iba senden ania Kohima Deputy Commissioner aser District Election Officer, Rajesh Soundararajan, IAS-i, election dak sendakba onüktem aser pei teinyaktsü shilem balala atema lemteptsü asoshi iba senden ya ayongzük, ta metetdaktsü.
Paisa züngsemtem dang candidate temi senden aser rally atema temelaba meshitsü asoshi online permission management portal, (suvidha) amshitsüla iba denji külemi tim ketdangsertem ajanga tim ROs dang NOC meshitsü metetdaktsü.
Paisa candidate ajak dang election nung tokteptsü atema tenüng agutsüba anogo atongtsü anogo kabosa lia Election expenditure monitoring atema bank Account temeja ka lapoktsü mepishia metetdaktsüba, den külemi yimtenren party ajak dang election timi agitettsü atema amalitepa inyaktsüla, kechiyong iba ya temzüng kübok teinyaktsü shilem ka lir, ta metetdaktsü.
Senden nung Kohima SP, Aotemsu-ia election junga tesünep nung agitettsü atema melungtet teloktem, yimtenren party tem aser nüburtemi amaliteptsü mepishiba den külemi election mapang nung security peria agütsütsü, ta metetdaktsü.
Nodal officer EEM aser Assistant Commissioner, Shashank Pratap Singh, IAS-ia Election Expenditure Monitoring indang tongmelang agi metetdakja liasü.
Model code of conduct indang metetdaktsüdang, EAC Weku Zhiemi-i, yimtenren party tem aser candidates ajaki election ozüng kübok tim masüba mapatem meinyaktsüla, kechiyong voters nem sübokrem agütsüba, voters amokmerenba, polling station tesem nung metre 100 telongtet nung nüboyimba aser election tembangtsü lia ghonda 48 tsüngda lokti senden ayonga agibatemji ozüng alema lir, ta metetdaktsü.
Paisa, party mesüra candidate shingaia mangatettep adoktsüsa mesüra tesempa adoktsüsa, mesüra tribe aser lokti tsüngda rara adoktsüsa meinyaktsüla, iba den külemi ali kibur, moapu aser kiojen kibur dang nungi temelaba magi wako masongtsüla aser banners memeyangtsüla, ta metetdaktsü.