Kohima nung eSport championship tenzükogo

Kohima, Luchii/December 06 (TYO): 25 buba Hornbill Festival nung shilem ka ama Department of Youth Resources and Sports, Nagaland ajana ayongzükba eSports championship anogo ana atema Hokulbarnü Hall B, Indira Gandhi Stadium, Kohima nung tenzükogo.

Iba eSports telemsa asem – Battleground Mobile India (BGMI) DOTA aser FC 24 nung northeastern states nungi tetokteper temi region balala nungi parnok partners den külemi tokteptar.

Iba sentong ya YRS Secretary Anthony Ngullie ajanga tenzükja liasü.

Sentong nung jembidang, tesüiba mapangbo saisapong ajunga tashi amshia asaya liasü saka tangbo technology mechi ajak melenshiogo, ta Ngullie-i ashi.

Tangbo nüburtem temeyong amshia internet nung FIFA aser danga games asayar, ta ashi.

“Mapang melenshiogo aser yimya ajak lenmang balaka leni aor aser asenok ama taintemia asen tangatetba melenshitsü nüngdaker,” ta pai ashi.

“eSports ya gamesa asayaba indang lir… Tashi amshia masü saka yimya balaka nung asayar, aser lanurtemi eSports nung toktepba ngua pelar,” ta ashi.

Iba sentong nung mendenpuba ama YRS Director Kethosituo Sekhose-i jembidang, saisapong yabo timba temang tashi amshia asayar, saka state sorkari eSports ya tenzük, kechiaser computer aser technology adokba sülen nüburtem takum aliba yimya nung temelenshi tulu asenoki nguogo, ta pai ashi.

“Asenoki iba technology tasenba agizüktsü nüngdaker, kong saisapong ya temang tashi amshiba kisüng masü saka tekolok shisatsü amshiba ka kumogo. Football nung kanga ajungba European linüktem nungbo PlayStation 5 mesüra FIFA 5 asayadaktsür, kechiaser yangi parnoki team ajungtsü asoshi tasa-lentong angatetba nung yarir,” ta pai ashi.

Iba yongji state sorkaria Nagaland nung eSports benoktsü telemtetba agi aser eSports tournament ayonger rongnung Nagaland ya mezüngpur alitsü, ta ashi.

“Asenokia medal angutsü, talisa asen northeastern states nungi eSports nung aser eSports Olympics nung takok angur alitsü imlar, koba 2025 küm Saudi Arabia nung tenzüktsü lir aser iba atema asenoka renemshitsü nüngdaker,” ta YRS Director-i ashi.

Tangbo state nung BGMI, Dota 2 aser e-football dang ayonger saka tarutsü nung ano eSports tournaments balala ayongzüktsü nükjidong lir, ta ashi.

Peniel Christian Revival Church indang assistant pastor Vikhoto Zao-i iba asayamung tenzüka sarasademja liasü aser iba eSports tournament final aser sempet agütsüba ya Honibar nikongdang alitsü.