Kohima nung ‘Futsal championship’ asayadar

Kohima, July 16 (TYO): Rüziezou Colony Youth (RCY), D-Khel Kohima village lenisüba nung asemnü asayamung, ‘Futsal Championship’ D. Khel Ground, Seikhazou, Kohima village nung Brihostibar anepdang nungi tenzüka asayadagi.
Iba asayamung nung shilem agir ajak agi telok 28 tashi lir.
Dapfutsumia Youth Organization (DYO) nung Tir aser Capi osangkaket yimozülur Mhaliezolie Kire-i iba asayamung lapoktsü.
Asayamung lapoktsüba mapang Kire-i, RCY-i lanurtem asoshi iba ama sentong tajung atongba tenungsanga ashi aser takok tashi teyari agütsütsü, ta shisem.
Pai ashiba agi, masüba lenmang aser machi-majemtsü nungi pila alibaren nung lanur tentettemi tongti shilem agir.
RCY-i iba kiyong shitakba lenmang nung aniba asoshi Kire-i tenüngsang agütsü.
Saisapong tapu aika liaka, asenok temang tsütsü nungi kodang reprangdangdir, Naga lanurtemi Futsal, Taekwondo aser Sepaktatraw kanga junga amteta asayatettsü, ta Kire-isa ashi.
Paisa asayartem dang mapang indokba ajanga aser meranga asayaba ajanga asayaba tesem nung ajaki tushitsüsa alitsü tetuyuba agüja liasü.
“Asenoki national aser international jenjang nung tangar den oa tokteptettsü,” ta ashi.
Kire-isa ashiba agi, nisung taini saisapong asayabaji anema alitsü asoshi asayar saka lanurtemibo nüngtugu akümtsü asoshi asayar.
“Nai junga asayaba ajanga na ajangzüktsü, anungji saisapong kanga reta agiang,” ta paisa ayongzük.
Iba asayamung ya July 18 nü tashi asayatsü.
Iba sentong nung adener ajak RYC Tir Zapuchiilie Khezhie-i pela agizük. Sentong lenir Vitholie Kire liasü aser Vilakho Khezhie-i ketdangsüa shilem agirtem tenangzükba agidaktsü.
Iba asayamung mezüng asaya nung Nourhe Kro-u-i 2-1 agi Veteran FC kokogo.