Kohima nung gari ana nungi ganja seret 391 apu

Dimapur, November 29 (TYO) : November 28, 2015 nü Kohima police-i Peducha check gate nung garitem mita reprangdang Maruti Van gari ka nung ganja seret 111 bena aliba apu.
Maruti Van gari (No. NL-01T-79140 nung ganjaji taseptsü tenet nung kanga junga sepbanger miima bena liasü aser iba dak sendakba nung gari driver Pouchi Namai apu.
Pouchi ya Manipur kübok Phaibung Khullen yimer Kho Namai’er jabaso lir ta jangjaogo aser iba dak sendakba nung Sechü (Zubza) P.S nung ken o ka benokogo, ta Sub-Divisional Police Officer & PRO, Kohima-i sangdong ka nung metetdaktsü.
Kasa anogo nung Peducha check gate nung ganja apuba mapangjisa police-i Tata Xenon gari ka soter mita reprangdang, iba gari nungjia ganja bena aliba putet.
Tata Xenon gari (AS-01FC-5940) telong nung ganja seret 280 miima bena liasü. Iba dak sendakba nung police-i gari driver apu, ta Kohima Police sangdong nungsa shia lir.
Police-i apusangji Khose Rhi lir aser pa ya Phek district kübok Tsupfume yimer Asasou Rhi’er jabaso ta jangjaogo. Pa anema Sechü (Zubza) P.S nung ken o ka benokogo.