Kohima nung gari ka, aser rakzükraktemer ka apu

Kohima, August 06 (TYO): August 06, 2015 anepdang 9:00 ako meta interstate check gate Khuzama anüker police aser Anti-Vehicle Theft Squad, DEF Kohima sepaitemi gari mita reprangba mapang Mahindra Pick-Up B/R No. MN-08C-0014 sentsü temesüng ka sotba sülen kuli kakettem reprangba mapang iba gari chassis aser engine number ji raksa’er liasü, ta Sub-Divisional Police Officer & PRO Kohima, Atu Zumvü NPS-i tanü sangdong ka ajanga metetdaktsü.
Iba gari anisangji Manipur, Senapati district kübok Phaibung Khullen yimer TH Pani’er jabaso arishi küm 26 P. Darhü lir ta jangjaogo, aser pa anema Khuzama Police Station nung ken o ka benokogo, aser maneni bushisüngdangtsü.
Ano tanga tatalokba ka nung yashi, August 05, 2015 nikongdang 3:00 ako meta mejangjaba nisung kari Tinpatti Junction (DBS road) Kohima nung sen khangdagi, ta North P.S Kohima dangi osang ka aruba sülen police tem iba tesem jagi arisanga oor nisung ka apu, ta kasa sangdong ajanga ashi.
Iba nisungba jagi telungpur tenüng amer Naga nunger masüba aayanger dang nungi sen khanga liasü. Iba nisungbaji tang telitak Kezekie, Kohima aser Tsiepama yimer Lt. Lozoto’er jabaso arishi küm 34 Neisakhoto Mema lir ta jangjago, aser pa anema Kohima North P.S nung ken o ka benokogo, aser maneni bushisüngdangtsü, ta kasa sangdong ajangasa metetdaktsü.