Kohima nung gari senzütsü asoshi totuyuba agütsür

Dimapur, Rongchii 11 (TYO): Kohima jila nung aliba gari lenmang nung timtem jenti ajuruba nungi anisüngzüktsü mechi Deputy Commissioner Kohima, Rajesh Soundararajan, IAS-i tang nungi tenzüka tsünglanglen agüja aliba ama garitem jajatsü metetdaktsü.
NHAK (Entry point) via Daklane-Naga Bazaar – Census/Tinpatti (Exit) ya one way dang asütsü aser iba lenmang nung light vehicle tem dang senzütsü melatsü, iba lenmang nung heavy vehicle kata senzütsü memelatsü.
Naga Bazaar – Razhu point junction ajanga gari kata maitdaktsütsü mesüra meyoktsü. Tinpatti – Census junction nungi NHAK tsütsüi gari kata maitdaktsütsü.
Iba totuyuba nung ajemdaker senzüsembonger aser item tesem mesüra colony nung alirtemi iba totuyuba yimya nung anidaktsü metetdaktsür, ta DC, Kohima ajanga sangdong ka nung ashi.