Kohima nung GeM SAMVAAD sentong agi

Kohima, January 17 (TYO): January 17, 2020 nü Directorate of Treasuries & Accounts, Kohima nung National outreach programme- GeM Samvaad sentong agiogo; iba sentong ya December 19, 2019 nungi February 17, 2020 tashi linük tesem ajungalen agitsü, ta ketdangsertem osang ka ajanga metetdaktsü.
Government e Marketplace (GeM) ya 2016 küm August 9 nü tenzük. Iba ya national public procurement portal ka lir; iba portal ajanga sorkar departments aser autonomous bodies indang nüngdak oset ajak alitettsü. GeM ajanga linük nung technology ajungketja contact masüba den paper aser sen mamshii shishilembateter. Iba ya inyakyim ajungtsü, teladak asütsü aser rongsenkettsüng ajungkettsütsü atema lir.
GeM Samvaad outreach programme nung stakeholders aser local shishilembartemi shilem agitettsü. General Financial Rules (GFR) 2017 kübok Rule 149 ajanga sorkar department ajaki GeM portal nung aliba osettsüset alizüktsü aser services agitsü atema shia lir.
Tejangrartemi Adhaar card amshia mobile number agütsüba ajanga primary buyer ama register sütettsü; ano külen tayokertemi Aadhaar aser pan information ajanga MCA 21 nung register sütettsü. Osang tejangja www.gem.gov.in nung angutsü.
Iba sentong nung okila jembidang Special Secretary, Finance, V. Kezo-i, inyakyim teladak asütsü aser tekaraba nung osettsüset alizüktettsü atema GeM ya sabang ka lir, ta metetdaktsü.
Paisa, GeM portal amshitsü atema tamasabo tasak asütsüa akok, ajisüaka iba ya ajanga tarutsü nung asenoki kanga tajangzük angutsü, ta ashi. Iba dak sendakba nung pai stakeholders, departments aser shishilembartem dang iba portal amshia angazüktsü aser amshidangtsü ayongzük.
Iba sentong nung shisalen sayurtemji Paritosh Singhal, ACED,GeM; Nirmal Kumar, DCEO, GeM; aser Biswajit Sankar, BF, GeM nunger liasü. Iba sentong nung sorkar departments ajak, State Public Sector undertakings, commercial organisations, start-ups, SHGs, Artisans aser teka mapa inyakertem aden.