Kohima nung Good Sound Management training katsüogo

Kohima, Metsüremi/March 23 (TYO): Kohima kübok Regional Centre of Excellence (RCEMPA) nung March 18 nungi tenzüka March 22, 2019 nü tashi Music Task Force (MTF) aser Youth Resources & Sports Department, Nagaland, Kohima-i anogo pungo ‘Training on Good Sound Management’ sentong ayongzüka katsüogo.
Anogo pungo tashi ayonga agiba training sentong ya – ‘Input & the devices’, ‘Processing technicalities’ aser ‘Output & the devices’ onük nung ajemdaker agia liasü.
Iba dak alia, theory den practical mapang, gadgets aser wire balala soldering asüba yimyatem sayua liasü. Training agirtem atema nüngdakba gadgets ajak MTF-i agütsü aser iba den külemi angati chia jemdakja liasü.
March 22, 2019 Hokolbarnü iba training sentong tembanga Akumla Chuba, NCS, Director Youth Resources & Sports tetushi tesemdanger ama aruagi dena liasü aser lai training nung shilem agirtem dang iba wadang nung mongin akümtsü atema tajungshiba agutsü.
Lai, lanurtem atema MTF aser Youth Resources Department nati maongka aser sabang balala agütsütsü, ta ashi. “Music tsütsü ‘Sound Managers’ temi shilem tulu agir saka aikati parnok ya mezüngshir (Unsung Heroes)” ta asüba olen ka nung ajemdaker lai, sound managers medeni artists tem nüngtugu akümtsü makok, saka shingaia parnok ya jangja mali aser mezüngshir, ta ashi.
Holi benjungmung National Holiday süaka sodi magi bendanga agüja training agütsüba atema Director, Akumla-i MTF team nem tenüngsang agüja liasü.
Training mapang angazükbatem ano maneni tejakleni bener aotsü aser jenjang kabo tongtettsü atema lai shilem agirtem ajungshia liasü.
Shilem agirtem nem Akumla-i certificate agütsü.
Maneni, training sentong adener parnok 35 tenüng nungi George Arche-i jembia liasü. Lanurtem dak aketba sempet tajung amshia aser sayutsü maongka agütsüba atema Youth Resources & Sports Department aser Music Task Force dang George-i pelaba metetdaktsü.
Training sentong nung shilem agirtem nem soldering gadgets, accessories aser achi ajemtsü densema tanga osettem angati agütsüba atema George-i achaayanger dang pelaba metetdakja liasü.
Iba sentong nung Project Director MTF Dr. Hovithal Sothu menden liasü aser pai telok pela agizük. Kasa sentong nung Adu Keditsu, Manager MTF-i tepela anküp o jembi. Sentong nung MTF aser lanurtem atema mapang agutsütetba aser parnok ajungshiba asoshi Adu-i Director Akumla dang pelaba metetdaktsü. Maneni, shisalen sayur Menguzelie Marcus Geisuo, Sound Engineer, MTF aser Arihba Kips nati training agiba piyong bendanga agüja shilem agirtem sayuba atema tena dang Adu-isa pelaba metetdakja liasü.