Kohima nung I-Day atema senden amen

Dimapur, Chiteni/July 31 (TYO): Kohima nung taküm Independence Day amungtsü asoshi mapalem aser achayangtsü sentong yanglutsü atema DC’s Conference Hall, Kohima nung Chiteni/July 31, 2018 nung senden ka menogo. Iba senden ya Additional Deputy Commissioner, Kohima, Lithrongla Tongpi Rutsa-i ketdangsüa agi.
Iba senden nung State Level Coordination senden ka Chiteni/July 12, 2018 nü Secretariat nung amenba indang lepa reprangshi, kong department balala, NGOs aser lokti tentet balalai Independence Day nung shilem agitsü mulunga liasü.
Independence Day 2018 aser Republic Day 2019 nung School Contingents temi shilem agitsüba atema jembiba mapang sorkar aser nija indang kaket rejutemi roaster system nung shilem agitsü ta iba indang department aser nija kaket rejutem dang ADC-i metetdaktsü.
Teshiemtet school tem ya telok ana küma lemsatsü aser mezüngbuba telok nungi tesadang ka Independence Day ceremonial Parade nung shilem agitsü aser tanüngba kaket reju tesadang ya 2019 Republic Day nung shilem agitsü. Kaket rejutem lemsaba ya talisa Republic Day ceremonial parade 2019 nung shilem agitsüpur kaket reju ketdangsürtemi meteta aser renemshia alitsü asoshi lir, ta lai ashi.
Independence Day parade rehearsal ya Luroi/August 7, 2018 anepdang 7:00 ako nungi Secretariat Plaza nung tenzüktsü aser rehearsal tatembangba ya Luroi 13, 2018 nü alitsü, ta laisa ashi. Rehearsal mapang school tanurtem belenshitsü asoshi SDO (Sadar) Kohima den longjemer inyaktsüla, ta shilem agitsü aliba school tem dang metetdaktsü.