Kohima nung I-Day atema traffic tetuyuba agütsür

Dimapur, August 13 (TYO): Secretariat Plaza, Kohima nung 71 buba Independence Day benjung amungtsü atema Kohima nung traffic tetuyuba kar agütsür, ta Sr. Superintendent of Police, Kohima-i sangdong ka nung metetdaktsü.
Secretariat Plaza telungi car pass shitak alirtem dang aitdaktsütsü aser Secretariat plaza tongti kishi temalen public tem parking asoshi lapoktsür, ta sangdong nung shia lir.
Maneni, BSNL Telephone Exchange nungi Classic Island, Raj Bhavan nungi M.S Classic Island aser Razhü Point adena Classic Island nungi Assembly Secretariat tashi August 15, 2017 anepdang 6:00 ako nungi gari ka danga lenmang anasa manendaktsütsü.
Independence Day sentong agiba mapang Sanuoru subway adena High School junction nungi Assembly Secretariat tashi government departmental bus tem dak alaka tanga gari tulutem mesenzüdaktsütsü, ta Kohima Police sangdong nungsa metetdaktsü.
Sentong matem tashi Kohima jila nung gari tulutem mesenzüdaktsütsü aser jila nung loading & unloading ji anepdang 6:00 ako matongdang tembangtsüla, aser gari tulutem “D” Block road nung anena meyudaktsütsü.
Item tetuyuba sülen public-i tashi anga anidaktsü imlar aser aibelenba garitem police-i atsür aotsü aser iba taaji gari kiburtemi menoktsü, ta Sr. Superintendent of Police-isa metetdaktsü.