Kohima nung IGNOU convocation kaogo

Dimapur, April 13 (TYO): 30buba Indira Gandhi National Open University Regional Centre Kohima convocation April 13, 2017 nü Modern College, Kohima nung kaogo, iba sentong nung Commissioner Secretary, IT & Communication, K.D Vizo tetushi tejaoker liasü.
Iba sentong nung jembidang Vizo-i IGNOU nungi degree aser diploma balala nung takok angur candidates ajak nem tenüngsang agutsü.
Candidates nem tenüngsang agutsüdang pai iba university-i talang nungi shisaliok agutsüba inyakyim atema tenüngsang agutsü.
Tanü putu nung Information technology ya kanga tongtibang ta shia Vizo-i shisashir ajak dang tan inyakyim nung ibaji benshitsü ayongzük.
Pai ashiba agi, takok angutsü atema joko shisaliok ya lenmang ka masü saka kanga kera melenshiba lima nung shisaliok ya nüngdak kümogo.
Kaketshirtem ajungmesotsüji tesayurtem kija khuret masü, saka takok angutsü atema tesayurtem, kaketshirtem aser tsüraburtemi longjemer inyaktsüla, ta paisa metetdaktsü.
Kaketshirtemi pei teinyaktsü mapa memetetra tsüraburtem aser institution kijai nendaka inyakbaji tagidak maka, ta paisa shisem.
Regional Director, IGNOU, Dr. T. Iralu-i report ka agutsü aser Section Officer, IGNOU Kohima, R.V. Tetso-i tepela anküp o jembia liasü.
Asst. Professor, Department of Education, Modern College, Deepali Thapa-i lokti pelaa agizük aser sentong nung Arenchenla-i temeja ken ka tena shilem agia liasü.