Kohima nung ILP Verification Process alitsü

Dimapur, June 25 (TYO): June 27 nungi July 29, 2017 tashi ILP Verification Process alitsü, ta ASU ILP Monitoring Cell-i sangdong ka nung metetdaktsü.
Iba mapa ya Angami Students’ Union (ASU) Office, Hq. (below AIR Station, B.O.C. Kohima) nung inyaktsü.
Kohima District nung aliba non-local ajaki ILP, Identify Card, trade license, voters ID aser tanga nüngdakba IDs bener arua kuli agüja tenüng züluoktsüla, ta ASU ILP Monitoring Cell Convener, Vizokho Zashümo-i sangdong nung shia lir.
Nisungtemi Original Documents den passport size noksa 2 bener arutsüla aser sorkar mapa inyaker o school tesayurtembo iba nung medendaktsür. Maneni, Union-i Kohima jila nung shishilembartem indang Enumeration Drive ka agitsü, ta sangdong nungsa metetdaktsü.
Ozüng alema arur kanga bulua akümba atema Angami Students’ Union-i tebilemtsü khuret abener. Iba inyakyim ajanga sensosangertemi timtem ajurutsü akok saka lendong nokdangtsü atema inyakba mapa nung ajaki angateta yariteptsü ayongzüker, ta ASU ILP Monitoring Cell Convener-isa ashi.