Kohima nung Include Vidya Campaign ayongzüka agiogo

Kohima, November 04 (TYO): Honibarnü Kohima nung school 23 nungi kaketshirtem aser tesayurtemi ‘Include Vidya Campaign’ rally nung shilem agiogo.
‘Include Vidya Campaign’ ya linük tesem ajaklen shi aser shisatsü naprong nung tangar memenepertem nem shisaliok agütsütsü atema lir.
Mezhür School over-bridge junction nung iba rally nung jembidang Director of School Education Department, Nagaland, Wonthungo Tsopoe-i, tesem ajaklen, talisa yimtsüngtem nung ajak nem shisaliok agütsütsü atema awareness agütsütsüla, ta ashi.
“Sarva Shiksha Abhiyan (SSA) kübok ajak temeten lir, ajisüaka awareness nüngdak, ibaji ajanga dang tangar memeneper shinga shisaliok nung mezüngdoktsü,” ta lai ashi.
Nagaland State Disabled Forum Advisor, Diethono Nakhro-i, “Nisung ajak shisaliok kasa angutsü temsüa lir, anungji state aser linük tesem ajaklen Sarva Shiksha Abhiyan ajanga teyari balaka nüngdaker tanurtema shisaliok nung züngoktsü atema onoki mepishir,” ta ashi.
“Onoki sorkar aser school education department dang mepishibaji, item tanurtem züngoktsü atema onoki ola adokba angaa inyakdaktsüner,” ta paisa ashi.
Guwahati nungi Regional Action on Inclusion Education (RAISE-NE) Advocacy Coordinator, Habib-i shisaliok nung züngokbaji Nagaland nunga atangji ataloktsü imlar, ta ashi.
Habib-i, iba campaign akaba tongtibangba nükjidongji school tem nung tangar memeneper tanurtem enrollment timba akumtsü aser shisaliok nung züngokdaktsüba maparen nung lokti aser tsüraburtema shilem agidaktsütsü atema lir, ta metetdaktsü.
Nagaland Disability Commissioner, Dr Atha Vizol-i, state nung tangar memeneper nisung 29,631 lir, ta metetdaktsü.
Rally dak sendakba nung Mezhur bridge junction nungi PR Hill tashi tanurtemi ozülu balala amer yimdong süa jaja liasü. Ozülu nungji “Tetsükdaktsü agienang”, “Taochi masü temeten”, “Shisaliok tajung angutsüji kü temeten”, “Regular SSA school-i aotsüji kü temeten”, “Ni nüngdakbaji ni meimtsüla aser ni agizüktettsüla” ta zülua liasü.
Tesülen State Academy Hall nung tetoktepba sentong balala agia liasü, aser item rongnung Inter-School Song Competition dena liasü. Iba tetoktepba nung St. Mary’s Cathedral-i mezüngbuba jenjang nung takok angu, Baptist High aser Corragio nati tanabuba aser tasembuba jenjang nung takok ngua liasü.
Tsüngsangba tetoktepba nung takok angurtemji- Ministers’ Hill HSS (first position), Model HSS (second position) aser Cherry Blossom School (third position) liasü. G Rio School aser Tabitha Enabling School natia special award angu.