Kohima nung Inter Department Badminton Tournament tenzükogo

Kohima, Mongputeni/October 22, 2021 (TYO): Hokolbarnü, Nagaland Legislative Assembly nung Inter Department Badminton Club (IDBC) ajanga ayongba ‘1st Inter Department Badminton Tournament’ tenzükogo. Nagaland nung iba asayamung (Inter Department Badminton) ya mezüng asütsü aser anogo ana tashi ayongzüktsü renemba asayamung nung team 55 agi shilem agidar, ta sangdong ajanga metetdaktsü.

Iba asayamung lapokba sentong nung, Minister for Planning & Coordination, Land Revenue and Parliamentary Affairs, Neiba Kronu-i, Department balala tsüngda tesendaktep tali tajungba yanglutsü asoshi iba asayamung ya tongtibang mera ka agir ama asütsü, ta ashi.

Kronu-i, badminton tajungtiba nung asayatsüla, kechiyong iba asaya kanga tajung aser temang atema kanga dang tajangzük, ta ashi.

Inter Department Badminton Club indang Convenor, Shanavas-i, COVID dak sendakba mera ajak nung anidaka iba asayamung ayongzüker, ta metetdaktsü.

Sorkar department tsüngda telongjem lidaktsütsü aser iba den külemi Department balala nung ketdangsürtem tsüngda tesendaktep tajungba yanglutsütsü nükjidong nung iba asayamung ayongzüker, ta Shanavas-i ashi.

Shanavas-i, anogo ana tashi asayatsü renemba asayamung nung, legislator tem team 55 lemsar – men’s category atema team 42, doubles atema team 7 aser mixed doubles atema team 6 densema Sorkar Department 22 agi shilem agidar, ta metetdaktsü.

Maneni, iba asayamung metenzükdang, Tournament Director, T Imtisungit Ao-i, shilem agirtem telok dang metetdaktsü. Honibarnü, Inter Department Badminton Tournament final asayatsü, ta kasa sangdong nung shia lir.