Kohima nung Inter-High School kenshi-oshi tetoktepba agi

Dimapur, Metsüremi/March 03 (TYO): Anogo ka district level Inter-High School kenshioshi tetoktepba sentong ka Department of youth Resources and Sports ajanga March 03, 2021 nü Lower Forest Colony indang Community Hall nung ayongzüka liasü, kong “The internet created to be a change” aser “Different forms of addiction among students” onük nung essay züluba aser quiz tetoktepba agia liasü.

Kaketshirtem jembishinü, zülubanglu nung renloktsü nükjidong nung iba Inter-High School kenshi-oshi tetoktepba sentong ya ayongzük, ta sentong lapoka jembiba mapang District Youth Resource Officer Chubarenla Longchari-i ashi.

Iba tetoktepba nung takok nguang tengu, nenok tajangzük kaka bo ngur kidangi aotsü, ta lai kaketshirtem ajungshia liasü.

“Takok anguba ya tenüng ka dang aser aji samatsü, saka nai angazükba shisatsü teti alitsü,” ta laisa ashi.

Iba sentong nung Chandmari Hr. Sec. School, Mt. Hermon, Stella Hr. Sec. School aser

Northfield school tem nungi shilem agia liasü, kong Dr. Moaakum Kichu Asst. Prof. Dept. Of Botany, Kohima Science College aser K. Alibo Achumi Asst. Prof. Dept. Of Sociology, St. Joseph’s College Jakhama na tetendanger liasü.

Essay tetoktepba nung Chandmari Hr. Sec. School nungi Emao M. Lam-i mezüngbuba

jenjang ngutet aser Stella Hr. Sec. School nungi Hisinle Kempi tanabuba aser Northfield School nungi Kechanei-u Huozha-i tasembuba jenjang nguteta liasü.

Maneni quiz tetoktepba nung mezüngbuba jenjang ya Mt. Hermon School-i angu, tanabuba aser tasembuba  jenjang ya Northfield aser Stella Hr. Sec. School nati ngua liasü.