Kohima nung jana bendentsü tesem nüngdaker

Kohima, Monupii/May 14 (TYO): Nagaland state ajunga nung nübudok mapa ayongzüka agiba sülen hopta ka jungogo. Tang New Capital Complex, Kohima temeket aser telungtet nung office-i aoertem teshinem menemba den külemi tereprangtsü kanga mejungi kümogo aser aji talisa Directorate of Labour-i aoba lenmangji jangratemtsükabo masü.
Tang Kohima jila telungtet nung nisung tasen kari iba mepetmesü angudang kanga aoksatsü aser office balala nung tenzüker tongtibang officer tem aliba ki tesemtem nung jana achaayangba maparentem ngua state inyakyim nung temulung chidaktsü.
Tatshitsü agi, tang Directorate of Labour office-i aoba lenmang, koba gari ana süitsü atema lenmang kanga temesü lir, ibaji jana-ona bendenba ajanga timtem ajurur. Iba lenmang ajanga süiba mapang tezüknem aser teronem balala agi na agizüka iba anogo jibo nai chiyongtsü chinüa maittsü. Iba denji külemi, temang tuozük aika alirtem atema iba tesem anogoshia semdangba ajanga tajangzük angutsü.