Kohima nung janaona endokdak tajung ka yangluogo

Kohima, Feb. 11 (TYO): Nagaland otsü nung mezüng asütsüsa tanü Kohima yimti nung janaona bendena endokdak Urban Solid Waste Management (SWM) tesem ka Chief Minister TR Zeliang-i semzüktsüogo.
Iba “Solid Waste Management” ya tayimtsü anendak anasa Lerie nung yanglur lir aser iba tesem yangluba ajanga yimti nung alirtemi janaona endokba jungjunga bendener kanga junga endoktettsü.
Kohima nunga tang tashi yimti tesem balala nungi bendenba janaonatemji gari nung bendena bener orr lenmang anasa longpang nung enoktsür, iba jagi tzü mopong menendaktsür. Ajisüaka, tang amenokba jana endokdak SWM nung ya taruba küm 25 tashibo janaona bendena jungjunga teshinem madokdaktsüi endoktettsü.
Yimti nung kiyong ajak nungi janaona jungjunga bendena endoktsü asoshi sorkari gari peria agütsür saka taoker aser tebendenertemi junga meinyaker, iba jagi teti yimti menener dang angur ta Chief minister-i metetdaktsü.
Anungji, tang nungibo Kohima Municipal Council (KMC) purtemi kiyong shia janaona jungjunga bendena bener oa Solid Waste Management alidakji endokdaktsütsüla, iba jagi dang SWM mapajia anogo shia shitak inyaktettsü ta paisa ashi.
Iba mapa inyaktettsüsa Asian Development Bank yariba asoshi Chief minister-isa pelaba metetdaktsü.
Iba mapa asoshi ADB nungi sen crore 48.04 apua North Eastern Region Capital Cities Development Investment Program (NERCCDIP), Government of India ajanga inyak ta Additional Program Director, SIPMIU, Er Krosu Rhetso-i metetdaktsü.
Iba sentong nung ADB program In-Charge, Pramod Kumar aser Advisor to Chief Minister (Urban Development), S I Jamir nati o tatsütsü jembia liasü.

You must be logged in to post a comment Login