Kohima nung kaket rejutem nung tekolakpur senden amen

Kohima, March 07, 2017: Mongolbarnü NBSE, Kohima conference hall nung Heads of institutions senden amenba noksa nung angur. 

Kohima, March 10 (TYO): Kohima nung aliba kaket rejutem nung tekolakpur tasen shima alirtem Nagaland Board of School Education (NBSE) indang conference hall, Kohima nung March 7, 2017 nü senden ka amen.
Kaket reju ketdangsüba aser inyakyim balala nung terenlok tali alitsü nükjidong nung iba senden ya agiogo. Iba senden nung kaket reju 82 nungi tekolakpurtem arua shilem agi.
Iba senden ya Controller of Examinations, Rangumbuing Nsarangbe-i ani. Ketdangsertemi NBSE inyakyim aser sentong balalatem indang rasaa ashi.
IT Coordinator, Kekhrielhoutuo Nakhro-i NBSE indang website nung keta alibatem tesayuba agütsü aser tongtepratep temelaba asütsü asoshi kaket reju shia email lapoktsü asoshia ajungshi. Online ajanga form balala agütsütsü asoshia ketdangseri tesayuba agütsü.
Kaket reju nung senotsü amshiyim aser shidi sen mamshitsü tesayuba kar, Deputy Secretary (Accounts), Ekyimo Shitiri ajanga agütsü.
Iba kasa senden nung Board ajanga tatidang yimya tasenba yanglushiba aser tatidang junga agitsü onük nung, Controller of Examination, Rangumbuing Nsarangbe-i jembi.
“Kaket reju ka nung tekolak ji tanurtem asoshi shisatsü tajung agütsür ka aser temelenshi bener arutsür ka asütsüla,” ta ketdangseri ashi. Kaket reju shidak amentettsü asoshia tesayuba agütsü.
Iba senden nung shilem agir ajunga dang CE ajanga pelaba lemsa aser tarutsü anogotem nunga shisa luyim tali tajungba küma terenlok alitsü asoshi amalitepa alitsü ajungshi.