Kohima nung kibong 50 tashi anien; NH-2 nung gari tila senzütsü lapokogo

(Abelen) Chiteni (July) 31, 2018 nü Pezielietsie colony nung anentsüh aliba tesem nungi ki oset belendang agiba noksa ka angur. (Achiji) Daklane nung Soul Harvest Church anasa Naga Hospital-Daklane-Census road anenbanger aliba angur. 

Kohima, Chiteni (July) 31 (TYO): Nagaland nung tzünglu aruba manener aser talisa Kohima nungbo kibong 50 dak tema tangaleni anienogo aser yasüng nungi tongtipang gari lenmang aika anentsüh aluba anenbanga lir.
Kohima kübok Naga Hospital Colony nung ki 13 aser Pezielietsie colony nung ki 36 raksaba osang angazükogo. Iba ajanga kibong 54 tashi timtem ajuruogo, ta Kohima nung Additional Deputy Commissioner, Lithrongla-i ashi.
Tzünglu aruba ajanga sen crore aika alang kiojentem aser alutem raksaogo saka nisung asüba mesüra yiruyibongba osangbo mali.
Tzünglu aruba ajanga anentsüh alupet alur Lithrongla aser tanü nikongtsütsü 4th NAP C Coy camp anasa Officer’s Hill nunga anentsüh tulu ka aluba osang angashiogo, ta Lithrongla-i ashi. La ya Kohima District Disaster Management Authority nunga vice chairman lir.
Yasüng Kohima jila nung tongtipang lenmang ka – Naga Hospital Junction – Daklane – Census office junction anenbang. Soul Harvest Church anasa retaining wall anenzüka aluba ajanga iba lenmang shibanga lir.
Daklane nung Head GB, Pukhato Achumi-i bangdakpurtem dang anentsüh alua aliba tesemtem reprangshimtsü atema ayongzükogo.
Tzünglu tulu aruba ajanga Kohima-Mokokchung sendaktepba National Highway-29 nung tesem aika nung anentsüh aluba ajanga garitem mesenzüteter, ta ADC Kohima-isa ashi.
Iba lenmang nung ali ondokba mapa inyakdar aser gari tilatem senzütsü atemabo lapoktetogo, ta osang ka ajanga ashi.
Tang nüngdakba jangotsü aser aonsotsütem gari tila ajanga belendar saka lenmang tia tamajungba kümra, petrol diesel aser gas amala peria mangutsü akok, ta Lithrongla-isa shisem.
Temjen Toy-i ‘High Level Meeting’ ayonga amen
Tanü Nagaland Chief Secretary, Temjen Toy, IAS-i tongti ketdangsertem indang rongdak senden ka ayonga amen.
Taoba ita ka shi tzünglu tanen makai aruba ajanga Nagaland kübok tesem aika nung timtem ajurur aser iba atema tanü senden nung osang metetpelaba den tebilembatem lemsatep.
Nagaland nung tang ’emergency’ tensa ka ama lir kechiyong state yimtiba dena district headquarters aika nung gari lenmangtem nokdanga lir, ta tanü Chief Secretary-i ashi.
Kohima aser Dimapur tsüngda gari lenmang indang onük jembidang Temjen Toy-i NPWD ketdangsertem dang lenmang lapoktsü aser anepalutsü atema nübo aser kol peria mapa lemzüktsütsü atema ayongzük.
Tensa tamajungba kümra, yariteptsü atema army ketdangsertem aser tanga agency tem den pai tongtepratepdar aser parnokia yariteptsü mulunga lir, ta Chief Secretary-isa shisem.
Anogo aika gari mesenzütetba tesemtem nungbo anüng nungi ‘essential commodities’ agütsütsü lenmang bushitepdar, ta paisa ashi.
Temjen Toy-isa NSDMA dang nisung taküm aser rongsen samaba noktangtsü atema nüngdakba mapa inyaktsü ayongzük.
“Iba ama tensa ka nung NPWD, NSDMA, administration aser police dang masü saka agency aser nisung ajaki yariteptsü mepishir” ta Nagaland Chief Secretary-isa ashi.
Senden nung Nagaland Commissioner, M. Patton-i district headquarters aser tanga tongti jilatem indang gari lenmang osang metetdaktsü.
Nagaland DGP, John Longkumer-ia senden nung S.Ps aser Battatlion Headquarters ajak dang yariteptsü osang sangoktsüogo ta ashi.
Tanü senden nung Ramakrishnan, Home Commissioner, Menukhul John, Principal Secretary, School Education, Himato Zhimomi, Commissioner and Secretary H&FW, Bendangkokba, Commissioner & Secretary, Works and Housing, Limadongdang, Chief Engineer, R& B, Lima Akum S.E (NH) aser Talisunep, Addl S.P Kohima nungertem aden.