Kohima nung konger tsünütsü tesayuba agütsü

Dimapur, Mongputeni/October 15 (TYO): Horticulture Department-i achaayanga Capital Convention Centre Kohima nung October 15 nü konger tsünüba dak sendakba nung training agütsüogo.
Training sentong nung o jembidang Director, Horticulture Dr. R Elithung Lotha-i, Horticulture Department-i süngjang, aonsotsü, tornem menemba aser mozü aketba süngtong litong terenlok asoshi inyakdar. Küm shia Department-i konger tsünütsü asoshi training agütsür, koba ajanga nügburtem rongsenketsüng jenjang ajungketer, ta shia training nung shilem agirtem dang parnoki angazükba ajak tajungtiba nung mapa küma benshia aotsü aser kasa tangazükbaji tangar danga sayutsü ajungshi.
Paisa, Department-i state healthy kümdaktsütsü inyakdar ta shia aluyimertem dang meranga inyaka parnok indang product timba kümdaktsütsü aser Department den teka amteper inyaktsü ayongzük. Director-isa Horticulture bulletin sayaja liasü.
Sentong nung shisalen agütsür Deputy Director Horticulture, Meyasashi Longkumer-i Oyster Mushroom tsünüba indang jembi aser Dr SosangLongkumer, Senior Scientific Officer, Alon Multi-Purpose Cooperative Society Limited, Nagaland-i Shiitake Mushroom indang jembia liasü. Iba sentong nung nisung 190-i shilem agiogo, ta ketdangser sangdong ajanga metetdaktsü.