Kohima nung Langpangkong kisükimong long azüng

Kohima, Feb.13 (TYO): Kohima nung Langpangkong Senso Telongjem Kohima purtem inti meyong ki ka Merhulietsa kiyong nung asütsü atema Bordarnü Nagaland PWD kilonser Wb.Tongpang Ozükümi kisü kimong long azüngtsüogo.
Iba kisü kimong long azüngtsüba mapang nübortem ajungshia jembidang, “iba ki yabo yimkong ki asütsü asünungji ajak kibur akümtsü asoshi, tuluba nungi shir tilaba tashi agi, pei yari tenla tsüktepa shilem agia yanglutsüla,” ta Wb.Tongpang Ozükümi metetdaktsü. Iba kasa sentong nung taoba Nagaland Chief Secretary aser LSTK kimen, Wb.P.Talitemjen Ao-ia lokti mapa takok ngua inyaka aotsü asoshi tajungshi o jembia liasü.
Iba sentong nungsa LSTK Building Construction Committee nung lenir aser Land Resources department nung Additional Director, Wb. A.Pangjung Jamir-i kimong alitettsüsa senso tajungtemi tenlaba aser inyaka aotsü sentongtem indang metetdaktsü.
Iba kimong meshiteta Kohima Ao Baptist Arogo nung sannüker Rev.A.Chuba Jamiri sarasadem aser LSTK tir Wb.M.N.Ajungba Ozükümi shilem agirtem ajak dang pelaba aser tayongzükba o metetdaktsü. Iba sentong nung menden Dr.Tali Imsong liasü aser sentong tembanga KABA nung deacon Wb. Mar Imsongi sarasadema liasü.
Kohima nung LSTK purtem ki yanglu tenzüktsüsa kimong aliteta inyaktetba asoshi tenla agütsür aser shilem agirtem ajak dang pelar aser iba mapa ya memenui takok angutsüsa ano maneni ajaki mulungsua shilem agitsü imlar, ta sangdong ka ajanga LSTK tongti zülur, Wb. Lepzüng Pongeni metetdaktsüogo.