Kohima nung Lirmen & Ungma nungeri Tsüngremmong benjung amung

Kohima nung Lirmen & Ungma nungeri Tsüngremmong benjung amung

August 2, 2016 nü Academy Hall Kohima nung Ungma Senso Telongjem-i ayongzükba Tsüngremmong benjung nung Advisor, SI Jamir (abelen)-i o jembiba angur.  Achiji nung Parliamentary Secretary Dr. Benjongliba Aier-i Kohima Lirmen Telongjem-i Capital Convention Centre Kohima nung ayongzükba Tsüngremmong benjung nung o jembiba angur.

Kohima, August 2 (TYO) : Kohima nung Ungma sensosanger noklang aika adenshia State Academy Hall, Kohima nung Tsüngremmong benjung amung.
Iba benjung ya Ungma Senso Telongjem Kohima ajanga ayongzük aser tongti tesemdangerji Urban Development Advisor, MLA S.I. Jamir liasü.
Sentong nung S.I. Jamir-i Tsüngremmong teratet metetdaktsü aser ano Employment & Craft Training Institute Director, Muthingnyuba Sangtam-ia o tatsüka jembi.
Tanü Capital Convention Centre nunga Kohima Lirmen Senso Telongjem-i Tsüngremmong benjung ayongzüka amung.
Iba sentong nung Agriculture Parliamentary Secretary & NSAMB Chairman, Dr. Benjongliba Aier-i tongti tesemdanger ama shilem agi.
Dr. Benjongliba-i tongti tesemdanger o jembidang ashiba agi, Tsüngremmong nung pei taküm aser loktiliba meshiteta Tsüngrem nungi temoatsü meshia amunger.
“Iba benjung ya loktiliba yanglutsü atema kanga tongtipang. Tsüngrem nungi temoatsü angutsü atema asenoki asen taküm meshitettsüla” ta paisa ashi.
“Tesüiba küm 50 tsüngda Naga nunger loktiliba kanga inlokogo. Asenok nütsüng yongsük lakh 5 shi aliba nungi lakh 20 jungogo. Küm 50 tejaklen azüngtsü aser zülutsü meteter noklang nung shilem 10 shi liasü saka tanü 85% jungogo. Azü ki nungi RCC ki nung alir aser arogo ishika aliba nungi arogo 1500 den tema kümogo” ta Dr. Benjongliba-isa shisem.
“Tsüraburi tanurtem dang takar akümtsü indang tesayuba tagütsü saka parnok tain küma aodang pela alitsü atema tesayubatem agüjang. Nisung tajungtemi ola madokba agi nisung tamajungtemi mapa inyakba ajanga alima kangshir. Asenoki tesüiba atema sasa mekazüli saka tanü tensa tajungba kümdaktsütsü aser jangratema alitsü atema bilemdi” ta paisa tesentepertem ayongzük.
Sentong nung A. Temjenlemba Longchar-i Tsüngremmong teratet metetdaktsü aser Dimapur Lirmen Senso Telongjem, Kohima Lirmentsür Telongjem o Toshinaro Imchen nungeri ken ajanga shilem agi.

You must be logged in to post a comment Login