Kohima nung Mahindra Servicing Centre ka lapokogo

Kohima, November 30 (TYO): Bodhbarnü Kohima nung Chief Minister, T.R Zeliang-i K & K Motors (Mahindra Authorized servicing centre) ka lapoktsü aser NBCC General Secretary, Rev. Dr. Zelhou Keyho-i meshiteta sarasademja liasü.
K & K Motors nung art workshop facility den tang tasentiba hadirtem aser training junga agiba technician tem lir. K&K Motors kiburji Kezhaletuo Kire aser Keneilhouzo Chielie na lir.
Iba sentong nung Chief minister, T R Zeliang-i, yangi Kohima nung Mahindra servicing station ka lapokbaji kanga nüngdaka aliba ka liasü, kechiyong Nagaland nung Mahindra gari aika lir, saka servicing station bo Dimapur nung dang liasü, ta ashi.
Chief minister-isa, Kohima nunga Mahindra showroom ka alitsüla, koba ajanga sorkar aser nüburtem nüngdak peritsü, ta ashi.
Pai ashiba agi, Servicing station ya ajanga mapa angutsü maongka adoktsü, kechiyong sorkari IT Department ajanga asen lanurtem nem technical training agütsüdar.
Kasa sentong nung NPF Tir, Dr. Shurhozelie Liezietsu, Parliamentary Secretary, Khumo, Chief Minister Advisor, Merentoshi Jamir, Mahindra nungi aser temeimertem densema liasü.