Kohima nung mezüngbuba North East Multi Media Campaign agitsü

India nung HIV/AIDS teimba aliba state tem rongnung Nagaland dena lir

Kohima, February 16 (TYO): Linük nung taintem dak HIV aser AIDS aliba jenjang tajemba kümogo aser ibaji 0.4% nungi 0.22% lir, ta National AIDS Control Society NACO Deputy Director General, Dr Naresh Goel-i ashi.
Linük nung jenjang ajema kümaka North Eastern Region nung HIV aser AIDS kanga lir aser Mizoram, Manipur o Nagaland nung teimba lir. Linük nung HIV & AIDS prevalent state tematiba asemji Mizoram, Manipur aser Nagaland lir, ta Dr Naresh-i ashi.
Tanü osangbener senden ka nung Health and Family Welfare Department Nagaland Principal Secretary I Himato Zhimomi aser Nagaland State AIDS Control Society (NSACS) Project Director Dr Ngangshimeren na lia Dr Naresh Goel-i iba osang ya metetdaktsü.
NACO-i mezüngbuba North East Multi Media Campaign agitsü aser iba ya NE kübok state 8 atema asütsü. Iba sentong ya February 18 nü Kohima Local Ground nung agitsü, ta paisa ashi.
“North East united against HIV/AIDS” omen nung ajemdaker agiba sentongji HIV/AIDS indang tebilemtsü lemsateptsü, lanurtem kümdanga alitsü ayongzüktsü, HIV/AIDS ashishitepba tangatetba agiendaktsütsü, HIV/AIDS dak sendakba services ajungkettsü aser HIV testing atema lir, ta Dr. Haresh Goel-isa metetdaktsü.
HIV positive rate ya arishi küm 15-24 tsüngda kanga bulua lir aser ibaki 19 lir. Anungji iba campaign ya item lanurtem dak tenük yoka agitsü, ta paisa ashi.
Iba sentong nung state 8 nungi kentenertemi shilem agitsü. Parnokji Arunachal Pradesh nungi The Megh, Assam nungi Tyrrhenian, Manipur nungi The Wishes, Meghalaya nungi Wreckless Shadow, Mizoram nungi Jerry Lalrinawma, Nagaland nungi Luli Yeptho & the Band, Sikkim nungi Roll Heads aser Tripura nungi Vanghmun 100 Yrs Band, ta paisa shisem.
Item kentener teloktem ya pei pei state nung SACS-i ayongzüka agiba Multi-Media Campaign nung takokertem lir.
State sorkar MLA shia nem HIV/AIDS atema sen lakh 1 agütsüba anentsü lemtetba atema tebilemtsü bena Dr Haresh Goel-i NSACS PD dang NACO dangi iba onük abentsü ashi.
Nagaland Legislative Forum on HIV/AIDS-i iba teyari magütsü nunga NACO-i sen talila agütsütsü akok, ta paisa shisem.
Nagaland nung aliba ART centre nung mozü peria maliba atema paisa ashiba agi, “supply chain management melenshiogo aser tang nungibo iba khuret majurutsü.”
Hombarnep 9:00 ako nung Health and Family Welfare Minister S Pangnyu Phom-i iba campaign tenzüktsütsü.
Sentong nung band competition dak alia HIV indang exhibition stalls, IEC materials alemba, food stalls, HIV testing facility, blood donation camps, free merchandise amala alitsü.
Sentong nungsa Alobo Naga, Dreamz Unlimited, Nise Meruno aser Tetseo Sisters-i shilem balala agitsü.