Kohima nung Minister, Metsubo Jamir-i Street Food Festival aser Job Mela tenzüktsü

Minister, Metsubo Jamir-i SHEHRI SAMRIDHI UTSAV sentong tenzüktsüba noksa nung angur.

Kohima, February 01 (TYO): Shehri Samridhi Utsav-Street Food festival aser Job Mela, koba dang ‘Urban Prosperity Festival’ ta ajar, iba sentong ya State Urban Development Agency den Health & Family Welfare kübok Food Safety, Nagaland aser Kohima Municipal Council-i Kohima nung February 1 nungi February 15, 2019 tashi ayongzükogo, ta tanü ketdangsertem osang ka ajanga metetdaktsü.
Hopta ana sentong ya tanü Directorate of Urban Development, Kohima conference hall nung Urban Development & Municipal Affairs Minister, Metsubo Jamir-i tenzüktsüogo.
Iba sentong nung jembidang pai züngsem ajak pelaa agizük aser mapang shidak nung Kohima nunga iba sentong ayongzüka agiba atema shilem agirtem aser department ketdangsertem dang pelaba metetdaktsü.
Paisa, jila aser yimtsüng na ya sendaktepa lir; jila nung azükaruji yimtsüng azükaru dak keta lir, ta ashi. Jilatem nung nüngdakbatemji timbaka yimtsüngtem nung alirtemi agutsür, ta shia pai yimtsüngtem nungi arurtemi yokyayokchitsü atema jila nung market junga alitsüji kanga nüngdak, ta ashi.
“Asen rongsenkettsüng nung, jila nung alirtemji alizükertem lir, aser yimtsüng nung alirtemji adokdaktsürtem lir, anungji asen rongsenkettsüng nung yimdaklirtem atema marketing facilities agutsütsüji kanga tongtibang,” ta pai ashi.
Paisa ward aser colony shia nung SHGs tentettsüji kanga tongtibang, kechiyong nübur kiojen kümzükba aser jana indokba tsütsü sorkar aser lokti yaritsüpur nisungtemji parnok lir, ta ashi. SHGs dak sendakba nung Minister-i, “iba tetezü, nü sasa na yaritsü aser tangar dang nungi teyari magie taküm alitsü atema sen aazüktsü asoshi lir,” ta ashi.
Kasa sentong nung jembidang Advisor, Rural Development, Dr. Neikiesalie Nicky Kire-i iba sentong tenzükba atema department den pelaba lemsatepba den külemi iba sentong ya Kohima jila atema kanga tapet, ta ashi.
Advisor-isa, iba scheme ya wards aser colonies tashi nunga agitsüla, ibaji ajanga talisa jila nung sensakertem aser leni maortemi taküm alitsü atema sen aazüktettsü, ta ashi.
Nagaland nung mapa dak sendakba nung pai, zünger temsüa alir lanur ajaki sorkar sector nung mapa mangutsü, kechiyong asen state nung joko sorkar mapa angutsü maongka mali, ta ashi. Iba dak sendakba nung pai, “Asenoki asenok ya kanga temaba jenjang nung lir ama bilema sorkar mapa dak alaka teka mapatem meinyakner,” ta ashi.
Kasa sentong nung Principal Secretary, UDD, Abhishek Singh, IAS-ia jembia liasü.
State Mission Director (NULM), S. Takatuba Aier-i lokti pelaa agizükba o jembiba den iba programme indang metetdaktsü aser Sec., UDD & Chairman SUDA, S. Nyanbemo Tsanglao leniba nung iba sentong agi. Iba dak alia Food Safety (H&F Welfare), AYUSH (H&F Welfare) aser Urban Development (SUDA) nati ayongzüka workshop agi aser IIJT, Kohima, AICSM, Wokha den Zynorics Initiative, Kohima-i Job Mela agi.