Kohima nung Nagaland School of Deliverance alitsü

Kohima, July 25 (TYO) : July 27 nungi 31, 2016 tashi Flames of Fire Baptist Church Kohima den Khristan lennirtemi Nagaland School of Deliverance sentong agitsü.
Iba sentong ya Kohima nung APO Hall, Phoolbari nung agitsü aser Pastor, Rokuolhoulie Solo-i school indang alizüng indang ashidang, Nagaland Khristan lanurtem rongnung Satan mesüra mojing külemba kanga bulua kümogo aser iba ya kibong atema dang masü saka loktiliba atema lendong keta lir, ta metetdaktsü.
Deliverance School nung anepdang 9:00 ako nungi Gospel services tenzüktsü aser aonung 7:00 nung tembangtsü.
School nung adenertem dang nungi registration fee agitsü aser nikongtsütsü 5:00 ako nungi agiba Gospel service bo angati dang asütsü, ta Rokuolhoulie-i ashi.
Mojing külemer aika küma aoer saka iba anema rarar kanga ajema lir. Anungji, samaa aliba lanurtem Yisu Khrista dangi meyipa anir arutsü atema jangrartem nem School of Deliverance nung tesayubatem agütsütsü, ta paisa shisem.
Iba school nung jembiba onüktemji – Symptoms of demonization, Signpost for Diagnosis – July 27; Biblical theology of Deliverance, Generational Curses, Occult Fantasy & Deliverance – July 28; Procedures and Agents in/for Deliverance, Qualities of a Counsellor in Deliverance – July 29; Demonization, Demon Possession & Devil Worship: A Discernment – July 30 and Practical Suggestions for Deliverance, Freedom Lifestyle: Post Deliverance aser Prepare for War – July 31 lir.
School of Deliverance nung o jembir aser shisalen sayurtemji- Flames of Fire Baptist Church Pastor, Rukuolhoulie, New Life Church Pastor Rev. Azahto Kiba, Joint Secretary Literatire NCRC Mezhüsevi Zutso aser RHEMA Tulsa, Oklahoma USA Avi Yongo nungertem asütsü.
Nagaland nung mojing külemer nisung 5000 nungi 6000 tsüngda ka alitsü amai asadangteter aser parnokji anir arutsü atema jembirtemi tesayuba balala agütsütsü, ta tayongertemisa metetdaktsü.