Kohima nung NCS band tentetogo

July 15, 2017 nü Kohima nung NCS Band züngsemtem- Andrew Imti, Kevin K. Zehol, Henok Phom, Tsuthsowe Kupa aser Anthony Ngullie nunger tangokba noksa ka angur. (DIPR)

Kohima, July 17 (TYO): Tang mezüng Nagaland nung July 15, 2017 nikongdang Kohima nung Henok Phom’er kidang Nagaland Civil Service (NCS) Band tentetogo; iba kentener telok nung züngsemtemji Bass guitar atemer, Anthony Ngullie, Lead, Andrew Imti, Drum Tsuthsowe Kupa, Vocal, Henok Phom aser Vocal, Kevin K. Zehol nunger lir.
NCS officers rongnung kentenmenü sempet aketer jenti aliba nung ajemdaker iba band ya tentet. Iba band ya NCS officers sempet arangshitsü atema sabang ka asütsü, iba den külemi iba sabang ajanga NCSA tesendaktep tali tashi itshitsü imlar.
Iba dak sendakba nung NCSA-i Commissioner & Secretary, Khrienuo Metha, NCS-i aria bilemtsüba aser lai drum-set tasen ka tenla agütsüba atema NCSA-i la dang pelaba lemsatep.
Tamalen NCS Officers kari Hornbill Rock Concert, 2011 nunga shilem agiogo.
Parnok ajak Kohima adener tangalen posting aliba ajanga practice asütsü aser Hornbill Rock Concert, 2011 nung shilem agitsü atema parnok indang casual leaves tenla agüja agia liasü.
Music ya International oshi ka lir aser kentenmenü agi arishi küm kecha mesükshir, aser iba ya ajanga NCS junior aser senior officers ajaki kentenmenü nung shilem agia ano iba dang nungi temaba jenjang ajangzüktsü imlar.