Kohima nung NEIPID-i TLM lemtsüba sentong ayonga agi

Kohima, March 27 (TYO) : National Institute for Empowerment of Persons with Intellectual Disabilities (NEIPID), Nagaland sorkar, Cherry Blossoms Society aser Nagaland Parents Association for the Disabled (NAPAD) teloktemi teloklok majuertem nem Teaching Learning Material (TLM) Distribution Camp ka March 24, 2017 nü nungi Old DC Bungalow Conference Hall, Kohima Nagaland nung ayonga katsüogo.
Iba sentong nung Zalekhrulu Lohe menden liasü aser Lerie Baptist Church, Kohima nung Sannüker Neichüriazo Chücha-i temoatsü jazüka sarasadem.
Social Welfare nung Additional Secretary, Wb. Z. Nyusietho Nyuthe tongti tesemdanger süa sentong lapoktsüba sülen Cherry Blossoms School tanurtemi pela agizükba ken ka aten.
NIEPID nungi Shilpa Manogna-i, sentong tasen kübok school tasemtem lapokloktsü tebilembaji junger aser otem school tem nung matamebensartem asoshi computer ajanga sayuba class takdangtem lapoktsü. Anungji center nungi item teyari agitettsü asoshi latetja aliba inyakyim shitak nung anidaktsüla, ta ashi.
NAPAD Secretary, Kapochu-o Naleo aser Cherry Blossoms Society nungi Purnima Kayina natia o tatsütsü jembi.
TLM (Teaching Learning Material) ya kanga tongibang kechiba süra iba yagi tangar dang nungi angazüktsü nung tera anüalemertem nem teyari agütsütsü aser parnoki asoshi kechisarena angazükba tsütsü terenlok agütsütsü, ta lai ashi.
Lai, iba mezükba sentong ya ano tarutsü mapangtem nunga agitsüji kanga tongtibang. Taoba mapang National Institute of Mentally Handicapped (NIMH) ta jaa aliba tang NEIPID ta melener aliba telok-i TLM sentong takok ngua asem tesemi bener arutetba asoshi kanga pelar, ta ashi.
Anogo ananü amungba sentong nung tongti tesemdanger Social Welfare nung Additional Secretary, Z. Nyusietho Nyuthe-i, ajak abensa alir aser malir nisung ajak kasa dang, kechiba süra Tsüngremi ajak Pa mesükba nung yanglu, ta tesentepertem dang ashi.
Pai, India temzüng ozüng nung ‘Rights of Equality’ inoka lir aser tangbo State Sorkaria matamabensartem asoshi sorkar mapa mekazüka yuja lir. Mezüng asem liasü saka tangbo 4 kümtsüogo, ta ashi.
Kohima Deputy Commissioner, Rajesh Soudararajan, IAS-i, Nagaland nung matamabensar tem asoshi telok tentet balalai meranga inyakba asoshi tenüngsang agütsür aser ano iba ama sabang tajung peria lapokloktsü ajungshir, ta o jembiba mapang ashi.
Pai, State nung iba mesükba mapa tajung nung paia nungita yaritsü nangzük aser iba amala sentong ya tang nungi ano küm nung anaben mesüra asembenbosa ayonga agi nung ajungtsü, ta shisem.
Paisa, sorkar aser telok balala nungi iba teyari agitsü asoshi nüburtem marendaki tenüng agütsütsü asoshi shisa agütsüteptsüla, ta ashi.
Iba sülen tanurtem nem TLM lemtsü.
Sentong tembanga Commissioner Disability, Nagaland, Atha Vizol-i anküp tepela o jembidang Tsüngrem nem tenüngsang agütsü aser Naga nunger tsüngda iba tsütsü shisa agütsüteptsü ashi.
Pai, NBCC-i küm shia November ita Deobar tasembuba Disable Sunday Day asütsü lemtetba atema kanga pelar, ta ashi.