Kohima nung NERP 2016 & SVEEP atema State Level NGOs senden amen

April 1, 2016 nü Hotel Japfu nung Nagaland CEO, Sanjay Kumar IAS-i NERP 2016 & SVEEP  senden nung o jembidang agiba noksa angur.

Dimapur, April 1 (TYO) : Election Commission of India (ECI)-i tawa National Electoral Roll Purification (NERP), 2016 sentong tenzüktsüba sülen Chief Electoral Officer, Nagaland, Sanjay Kumar IAS-i Hokolbarnü State Level NGOs den senden ka amen.
NERP 2016 & Systematic Voters’ Education & Electoral Participation (SVEEP) sendenji Hotel Japfu nung ayongzüka agi aser iba senden nung CEO-i Electoral Roll Purification dak sendakba onük kar lemsatep.
Taoba Census nung nütsüng merenlokba state ji India nung Nagaland State dang liasü aser iba tebilemtsü khuret ya Nagaland senso ajaki abentsüla, ta Sanjay Kumar-i metetdaktsü.
Electoral Roll metongshia yangluba mapaji Election Department indang dang masü saka telok balalai iba nung yariteptsüla, ta paisa ayongzük.
Iba dak sendakba nung taruba Election atema Electoral Roll yanglusihba maparen nung teloktemi yimtsüngtem nung Electors jangjashitsü atema mapa inyaktsüla, ta paisa tebilemba ka lemsatep.
Sanjay Kumar-isa Nagaland nung Arogotemi Election department nem pei arogo züngsem metetdaktsü nung junger ta tebilemba shidang aser Electoral Rolls nung tenüng talila züluokbaji ozüng alema inyakba mapa ka lir ta Arogotemi pei nütsüng dang ashitsü atema mepishia metetdaktsü.
Senden nung Deputy Chief Electoral Officer, Vekho Vero-ia o jembidang ashiba agi, Election Commission of India (ECI)-i March 1, 2016 nü National Electoral Roll Purification (NERP) Programme tenzük.
NERP 2016 nung sensotem tenüng züluoktsü, tenüng talila züluoka alirtem, tasür aser vote magütsürtem tenüng agientsü, EPICs metongshitsü aser data errors agientsü, ta Vekho Vero-isa metetdaktsü.
Iba maparen ya August 31, 2016 nü tembangtsü, ta paisa shisem.
Senden nung mendenji Joint CEO, N. Moa Aier-i mulungtet teloktem dang Nagaland nung Electoral Roll takok ngua metongshitettsü atema yariteptsü ayongzük.
Nagaland Baptist Church Council (NBCC)-i May 22, 2016 nü Clean Sunday ta ser amungtsü aser iba asoshi NBCC kübok aliba arogo 1566 dangi shidi zülutsü ta tanü senden nung metetdaktsü.
Senden nungsa Youth Net, Naga Hoho, NSF, Naga Blog, ENPO, ENWA, NMA, NPMHR, NCRCC, CAN aser Nagaland Post nungertemi tebilembatem lemsatep.