Kohima nung Netaji küm 120 ajungba mung among

Kohima, January 25 (TYO): Netaji Subhash Chandra Bose küm 120 ajungba anogomung Raj Bhavan, Kohima nung munga asür nem naro akhüm agütsü, aser iba sentong nung Commissioner & Secretary to Governor, Piyush Goel-i Netaji taküm otsü aser pa mapatem indang metetdakja liasü.
Pai ashiba agi, British nunger yimsüsüba talenba nungi India nunger nüjiso anguba nung Netaji-i tongtibang shilem ka agi. ICS Examination nung jenjang 4buba nguaka India nüjiso atema raratsü asoshi pai doktsür ao. 1938 küm pa Indian National Congress Tir aküm, aser tesülen British sorkari pa tepuokdak ayu saka pai jenteta INA tentet aser 1944-45 küm Manipur aser Nagaland nung British nunger sepaitem den rara.
Angh PB Acharya-ia, India nunger British talenba nungi salatsü atema Netaji-i INA tenteta Kohima nung British nunger den rara, ta ashi.
Angh-isa, India nunger nüjiso angutsüsa Netaji Subash Chandra Bose-i inyakba mapaji züngshitsü mapang tongogo aser Netaji aser INA nung tasütait sepaitem nüngtem nung Kohima nung nüngo ka yanglutsütsü temsüa lir, ta ashi.
Sentong nungsa Raj Bhavan züngsem ajaki Netaji noksa matsüngdang naro akhüm agütsü.