Kohima nung Ni Riteper kensep sayaogo

Dimapur, Rongchii 16 (TYO): SCERT, SIEMAT Hall, Kohima nung Rongchii (April) 14, 2018 nü Lima Longkumer-i yangluba ‘Ni Riteper’ kensep ka sayaogo.
Iba kensep sayaba sentong ya Kohima Ao Baptist Arogo (KABA) nungi pastor Sentisashi-i ketdangsüa agi aser tarur pela agizükba o jembi. Pai iba sentong nung jembiba mapang, nisung shia otsü lir aser otsü ajak nung yimya kaka lir, koba ajanga asen otsü lemsar, ta ashi.
Kensep ka sayaba ya takok tulu lir, kechiyong kensep ka sayatsü ya asenoki angaba ama temela masü, iba ya kibong, medemer aser külemi inyakertemi teyari agütsüba ajanga takok anguba lir, ta pai ashi.
Lima Longkumer-i pa indang kensep indang jembiba mapang, iba ken ajanga osang ka sangoktsü, kong tanü tensa nung nisung ajaki rongsen tali sabur aser tanülar tejangraba meinyaki item rongsen bendenba nung mapang aser tashi ajak indoker, ta ashi.
Tanü tensa nung angatetba ka nüngdaker kechiaser nisung aika rongsen jenti liaka taküm nung chichiba tepela monguteter. Ka ama bilemba aser asen loktiliba nung ochi melena pei agitsü dang bilemba yimya agi kokogo, ta Lima Longkumeri ashi.
Paisa ashiba agi, mapa meranga inyakba tanüla samaogo aser iba ajanga ochimashi adoktaktsür aser taküm alitsü atema tzümar dak dang metaloka alir.
“Tenem ajanga ajak asoshi yimchiyimjung adoktakjang kechiaser lenirtemi kechi shidak aji inyaker, sensaker, tanur aser nüngdakbapurtem kümzüktsü aser anemertem madak takok angutsü asoshi parnok yariang’ ta asüba olong nungi agizüka iba ken ya zülu aser temeim aser nüburtem tsüngta ka ama bilemtsü osang iba ken ajanga agütsür, ta pai shisem.
Lima Longkumeri 1995 küm English oshi nung kensep ka saya aser 80’s aser 90’s mapang pai All India Radio aser Doordarshan Kendra, Kohima nunga ken tena liasü.
Iba kensep ya KABA pastor Sentisashi-i sayatsü aser kasa sentong nung Mesenti-ia temeja ken ka aten.