Kohima nung nisung ka arakset; Ki ka arong

Kohima, November 11 (TYO): Bodbarnü Kohima nung Central Bridge anasa AG Colony tsünglanglen aliba ayong nung lanur ka tzü nung arakset.
Tasüsangji Naga Bazar colony nung alir Khriekuo Solo’er jabaso Thejanguzo Solo ta jangjaogo.
Pa den medemer trok ayong jagi ao aser Central Bridge anasa ayong nung parnok tzü nung kazütsü atema pai tzü tarok tendangdang, ajungbena pa azü ka nung songoker madoktet, ta osang angazüker.
Par medemertem kati danga tzüwa mashi liasü aser parnoki teyari bushitep. Idangji tzüwa ashir süisübonger kati yariteptsü merang, saka paia Thejanguzo mekümzüktet. Tatsüka lir külen pa mang tzü nungi agiteter par kinünger ket nung agütsüogo.
Ano tanga osang ka nung, Bodbar nikongtsütsü Kohima kübok Kezekie (North Block) nung kitsükkirong lendong ka ataloka kibong aika talidak makai kümogo.
Nikongtsütsü 6:15 ako meta North Police station teküboklen aliba aliba bus parking anasa iba lendong atalok.
Gari lenmang anasa dang süaka, mi ensepertem mapang shitak nung tonga maruba ajanga azüklen anaben amentepa atuba ki mitsü küma rongdok, ta osang kar ajanga ashi.
Mapang shitak nung osang agüjaka Fire & Emergency Services-i gari ana dang yok saka tzü peria maliba agi garitemji meyipa aotsüsa aküm, ta nisung kari ashi.
Kiyonger aser süisübongertemi kanga meranga mi enseptsü merangba agi dang tanga kitem rongloka mao. Ajisüaka, mi jagi anameta aliba RCC ki karbo raksatsü. Tatem nung mi ensepba gari pungu tashi arua miji enseptet, ta osang ajangsa metetdaktsü.